İyshaya 27 bob
1 Sol ku'ni Jaratqan İye g'a'zepli, ullı ha'm qu'diretli qılıshı menen, Qashıp baratırg'an, iyren'legen jılandı, Liwyatandı jazalaydı. Ol ten'izdegi usı aydarhanı o'ltiredi.
2 Sol ku'ni a'jayıp ju'zimzar tuwralı qosıq aytın':
3 «Men – Jaratqan İye onın' qarawılıman, Ba'rqulla onı suwg'arıp, Hesh kim zıyan tiygizbesin dep, Ku'ni-tu'ni onı qarawıllayman.
4 Men g'a'zeplenbeymen. Eger tiken ha'm jantaqlar Mag'an qarsı shıqsa, Men olar menen urısıp, Olardı tolıq jag'ıp jiberemen.
5 Yamasa olar Mennen pana izlep kelsin, Menin' menen kelisim du'zsin, Awa, Menin' menen kelisim du'zsin».
6 Keleshekte Yaqıptın' urpag'ı tamır jayadı, İzrail bu'rtik jarıp, gu'lleydi, Jer betin miywege toltıradı.
7 Jaratqan İye izraillılardı, Olardı jazalag'anlardı jazalag'anday etip jazaladı ma? Yamasa izraillılardı, Olardı o'ltirgenlerdi o'ltirgendey etip o'ltirdi me?
8 Jaratqan İye olardı hu'kim etti, Quwıp, su'rgin qıldı. Olardı shıg'ıs samalı kibi, G'a'zepli demi menen quwıp shıg'ardı.
9 Solay etip, Yaqıptın' urpaqlarının' ayıbı alıp taslanıp, Gu'nasının' o'teliwinin' miywesi mınaw boladı: Qurbanlıq orınnın' barlıq tasların, Ha'k tasları kibi sındırg'anda, Kiyeli ag'ashları da, tu'tetki tu'tetiletug'ın orınları da qalmaydı.
10 Qorg'an qala qan'ırap bosap, Sho'lge uqsap ta'rk etilip, Taslandı jurtqa aylanadı. Ol jerde baspaqlar otlar, Ag'ash shaqaların sıp-sıydam etip, sol jerde jatar.
11 Shaqaları quwrap sınar, Hayallar kelip, olardı jag'ar. Bul xalıq es-aqılınan ayırılg'an, Sonlıqtan Jaratqanı da olarg'a rehim etpes, Jaratıwshısı da olarg'a mehir ko'rsetpes.
12 Sol ku'ni Jaratqan İye Evfrat da'ryasınan Mısır shegarasındag'ı da'ryag'a deyin da'ndi qawıg'ınan ayırıp, İzrail xalqın birme-bir jıynap aladı.
13 Sol ku'ni ullı ka'rnay shalınadı. Assiriyada joq bolg'anlar ha'm Mısırg'a su'rgin etilgenler kelip, Erusalimdegi muxaddes tawda Jaratqan İyege sıyınadı.
