İyshaya 26 bob
1 Sol ku'ni Yahuda jerinde mına jır aytıladı: «Bizde ku'shli qala bar, Qudayımızdın' qutqarıwı, Diywallar menen qorg'anlar sıyaqlı onı qorg'aydı.
2 Da'rwazalardı ashın'lar! Sadıqlıqtı saqlag'an a'dil millet ishke kirsin.
3 Sag'an u'mit artqanı ushın, Pikirin Sag'an bag'ıshlag'andı, Tolıq tınıshlıqta saqlaysan'.
4 Jaratqan İyege ma'n'gige u'mit bayla, O'ytkeni Ol ma'n'gilik su'yewshi jartas.
5 Ol ta'kabbirlerdi jerge urar, Biyik qalanı qulatar, Jer menen jeksen qılıp, topıraqqa aylandırar.
6 Ol qala ayaq-astı bolıp, Jarlılardın' ayag'ı, Ka'mbag'allardın' tabanı menen basqılanar».
7 A'dildin' jolı tegis, Haq Bolg'an, Sen a'dildin' soqpag'ın du'ziw qılasan'.
8 Jaratqan İye! Hu'kimlerin'e a'mel qılıp, Seni ku'temiz. Atın' ha'm Seni este saqlaw ju'regimizdin' tilegi.
9 Tu'nde janım Seni an'saydı, İshimdegi ruwxım Seni izleydi. Jerde hu'kim ju'rgizgenin'de, Du'nyada jasawshılar a'dillikti u'yrenedi.
10 Zalımg'a rehim ko'rsetilse de, Olar a'dillikti u'yrenbes. Ha'tte, haqıyqatshıllardın' jerinde nahaqlıq eter. Jaratqan İyenin' ullılıg'ın ko'rmes.
11 Jaratqan İye, qolın' ko'terilgen, Biraq olar ko'rmes. Olar Senin' xalqın'a degen ıqlasın'dı ko'rip, uyalsın. Dushpanların'a niyetlegen ot olardı jalmasın.
12 Jaratqan İye! Sen bizlerge tınıshlıq beresen'. İslegen barlıq islerimizdi bizler ushın ju'zege asırg'an Sensen'.
13 Qudayımız Jaratqan İye, Sennen basqa iyeler bizlerge hu'kimdarlıq qıldı. Biraq bizler tek Senin' atın'dı hu'rmet etemiz.
14 Sol iyeler du'nyadan o'tti, O'lilerdin' ruwxları endi ornınan turmaydı. Sen olardı jazalap, joq qıldın', Endi olardı hesh kim yadqa almas.
15 Jaratqan İye, sen milletimizdi ko'beyttin', Milletimizdi ko'beytip, dan'q qazandın', Elimizdin' shegarasın ken'eyttin'.
16 Jaratqan İye, xalqımız qayg'ı ishinde Seni izledi. Sen olardı jazalag'anda, Sıbırlap zorg'a duwa etti.
17 Jaratqan İye, bizler de Senin' aldın'da, Ha'miledar hayaldın' tolg'aq azabınan qıynalıp, Baqırg'anı sıyaqlı qıynaldıq.
18 Bizler ha'miledar bolıp, tolg'attıq, Biraq samaldan basqa hesh na'rse tuwmadıq. Jer betine qutqarılıw alıp kelmedik, A'wladlardı da du'nyag'a keltirmedik.
19 Biraq o'lilerin' jasar, deneler tiriler. Ha'y, topıraq astında jatırg'anlar, Oyanın', shadlıqtan qosıq aytın'! Sebebi Jaratqan İyenin' shıg'ı tan' shıg'ına megzer, Jer o'lilerdi jasaw ushın shıg'arar.
20 Kelin', ha'y xalqım, bo'lmelerin'izge kirip, İshten qapını jawıp alın'! Onın' g'a'zebi o'tip ketkenshe, az-maz jasırınıp turın'.
21 Mine, du'nya turg'ınların islegen ayıbına bola jazalaw ushın, Jaratqan İye O'z ma'kanınan shıg'ıp kiyatır. Jer o'zine to'gilgen qandı a'shkara eter, O'ltirilgenlerdi artıq jasırmas.
