İyshaya 24 bob
1 Mine, Jaratqan İye du'nyanı wayran etip, qarabaqanag'a aylandıradı, Jer betin ku'l-talqan etip, turg'ınların tarqatıp jiberedi.
2 Xalıqqa ne bolsa, ruwxaniyge de sol boladı, Qulg'a ne bolsa, xojayıng'a da sol boladı, Shorıg'a ne bolsa, biykege de sol boladı, Qarıydarg'a ne bolsa, satıwshıg'a da sol boladı, Qarız alıwshıg'a ne bolsa, qarız beriwshige de sol boladı, Qarızdarg'a ne bolsa, payda alıwshıg'a da sol boladı.
3 Jer beti tolıq wayran etilip, tolıq talan-taraj qılınadı. Bul so'zdi Jaratqan İye ayttı.
4 Jer ju'zi kewip, qurg'ap qaladı, Du'nya so'nip, solıydı, Du'nyadag'ı ku'shliler ku'shten taladı.
5 Du'nyada jasaytug'ınlar jerdi haramladı, Olar nızamlarg'a boysınbadı, parızlardı ayaq astı qıldı, Ma'n'gilik kelisimdi buzdı.
6 Sol sebepli du'nyag'a na'let jawadı, Turg'ınları gu'nasının' jazasına tartıladı. Jer betinde jasawshılar otqa jag'ılıp, Tek azg'antay adam qaladı.
7 Taza sharap azayadı, ju'zim putaları solıydı, Shadlanıp ju'riwshiler ah uradı.
8 Da'ptin' shadlı hawazı basıldı, Quwang'anlardın' sesti tındı, Liranın' shadlı hawazı da so'ndi.
9 Endi qosıq aytıp sharap ishpes, O'tkir ishimlik da'mi de ishkenlerge ashshı tu'yiler.
10 Wayran bolg'an qala qarabaqanag'a aylang'an, Ha'r bir u'y jabılg'an, hesh kim kire almas.
11 Ko'shelerde sharap ushın nala sheger, Shadlıq qayg'ıg'a aylang'an, Quwanısh jer betin ta'rk etti.
12 Qala qarabaqanag'a aylang'an, Qala da'rwazaları ku'l-talqan bolg'an.
13 Za'ytu'n ag'ashı qag'ılg'anda, Yaki ju'zim jıynap alıng'annan keyin, Qalg'an miywelerge ne bolsa, Du'nyadag'ı milletlerge de sol boladı.
14 Aman qalg'anlar dawısların ko'terip, Shadlıq qosıqların aytadı, Jaratqan İyenin' ullılıg'ın aytıp, Batıstan baqıradı.
15 Sonlıqtan shıg'ısta Jaratqan İyeni, Ten'iz jag'asında İzraildın' Qudayı Jaratqan İyenin' atın dan'qqa bo'len'.
16 Jerdin' shetinen alg'ıs-maqtaw qosıqların esitemiz: «A'dil Bolg'ang'a dan'q-ataq bolsın!» Biraq men bılay dedim: «Sorım qurıdı, sorım qurıdı! Ha'siret shegemen! Satqınlar satqınlıq qılmaqta, Satqınlıg'ı sheksiz olardın'».
17 Ha'y du'nyada jasawshılar! Qorqıw, shuqır ha'm duzaq basın'ızg'a tu'sedi.
18 Sonda qorqıw dawısınan qashqan shuqırg'a tu'sedi, Shuqırdan shıqqan duzaqqa tu'sedi. Ko'klerdin' qapıları ashılıp, Jerdin' tiykarı titireydi.
19 Jer bo'lek-bo'lek bolıp, Maydalanıp ketedi, Ol ku'shli silkinedi.
20 Jer ma's adamday su'rnigedi, Dawıldag'ı shertektey shayqaladı, Qılmısları og'an awır ju'k boladı, Jıg'ıladı, qaytıp tura almaydı.
21 Sol ku'ni Jaratqan İye joqarıdag'ı, ko'klerdegi ku'shlerdi, Jerdegi du'nya patshaların jazalaydı.
22 Olar zindandag'ı tutqınlar kibi, bir jerge jıynalıp, Zindang'a qamaladı ha'm bir qansha waqıttan keyin, jazalanadı.
23 Sonda ay uyalıp, quyash shermende boladı. A'lemnin' Jaratqan İyesi Sion tawında, Erusalimde patshalıq etip, Xalıq aqsaqalları aldında O'z saltanatın ko'rsetedi.
