İyshaya 22 bob
1 Ayan oypatlıg'ı tuwralı payg'ambarshılıq so'z: Ne boldı sizlerge? Nege ha'mmen'iz u'sheklerge shıg'ıp aldın'ız?
2 Ha'y, shawqım-su'renge tolı, G'almag'allı ha'm shadlı qala! O'lgenlerin'iz qılıshtan da o'lmedi, Sawashta da o'lmedi.
3 Hu'kimdarların' birgelikte qashıp ketti, Biraq oq jaylarınan bir oq atpay-aq tutqıng'a tu'sti. Olar uzaqqa qashıp ketken edi, Tabılg'anlardın' ha'mmesi tutqıng'a alındı.
4 Sonda men bılay dedim: «Meni jalg'ız qaldırın', o'kirip jılap alayın. Xalqımnın' qırg'ıng'a ushırag'anı ushın, Ta'selle bermen' mag'an».
5 Sebebi İyem, A'lemnin' Jaratqan İyesinin', Ayan oypatlıg'ında g'awg'alı, qorlıqlı ha'm ala-sapıran ku'ni boladı. Sol ku'ni diywallar qulap, Ja'rdem sorag'an dawıslar tawlardı jan'g'ırtadı.
6 Elam oq jay ha'm og'ın alıp, Sawash arbaları ha'm atlıları menen keldi. Kir a'skerleri qalqanların tayarladı.
7 Senin' saylandı oypatlıqların' sawash arbalarına toldı, Atlılar qala da'rwazası janında sap tartıp tur.
8 Jaratqan İye Yahudanın' bekinislerin ku'l-talqan qıldı. Sol ku'ni «Lebanon tog'ayı» sarayındag'ı qural-jaraqqa u'mit etip qaradın'ız.
9 Sizler Dawıttın' qalasının' diywallarında ko'p jarıqlardı ko'rdin'iz. To'mengi hawızg'a suw saqlap qoydın'ız.
10 Sizler Erusalimdegi u'ylerdi qarap shıg'ıp, Diywaldı pitew ushın, u'ylerdi buzdın'ız.
11 Eski hawızdın' suwları ushın, Eki diywal arasına suw saqlag'ısh qurdın'ız. Biraq bunı Kimnin' oylap qoyg'anına na'zer salmadın'ız, Bunı Kimnin' a'zelden joba qılg'anına itibar bermedin'iz.
12 Sol ku'ni Quday, A'lemnin' İyesi, Jılap, aza tutıwg'a, Shashların'ızdı aldırıp, aza kiyimin kiyiwge shaqırdı.
13 Biraq sizler: «Kelin', jep-isheyik, erten' o'lemiz», – dep, O'giz soyıp, qoy shalıp, Go'sh jep, sharap iship, Keypi-sapa qurıp atırsız.
14 Sonda A'lemnin' Jaratqan İyesi qulag'ıma: «Bul gu'na o'lgenin'izshe keshirilmeydi», – dedi. Bunı Quday, A'lemnin' İyesi ayttı.
15 İyem, A'lemnin' Jaratqan İyesi bılay deydi: «Qa'ne, patshanın' on' qolı, saray basqarıwshısı sol Shebnag'a barıp, bılay dep ayt:
16 „Bul jerde ne jumısın' bar? O'zin'e qa'bir oyatug'ınday, bul jerde kimin' bar? Joqarıda o'zin'e qa'bir qazıp, jartasqa jasaw ushın u'n'gir oyıpsan'.
17 Ha'y, ku'shli adam! Jaratqan İye seni ılaqtırıp jiberedi. Ol seni bekkem uslap alıp,
18 aylandırıp-aylandırıp, top kibi ken' bir elge ılaqtırıp jiberedi. Sen sol jerde o'lesen'. A'jayıp sawash arbaların' sol jerde qaladı ha'm sen mırzan'nın' u'yin shermende qılasan'.
19 Men seni o'z lawazımın'nan tu'sirip, ornın'nan alıp taslayman.
20 Sol ku'ni Men qulım Xilkiya ulı Elyakimdi shaqıraman.
21 Senin' kiyimlerin'di og'an kiygizip, beline belbewin'di baylayman ha'm ha'kimshiligin'di og'an beremen. Ol Erusalim turg'ınlarının' ha'm Yahuda xalqının' a'kesi boladı.
22 Dawıttın' u'yinin' giltin onın' moynına asaman. Onın' ashqanın hesh kim jaba almaydı, onın' japqanın hesh kim asha almaydı.
23 Men onı qattı jerge qag'ılg'an qazıqtay etip qag'aman. Ol o'z na'sili ushın saltanat taxtı boladı.
24 Onın' xojalıg'ının' pu'tkil abırayı: onın' urpaqları ha'm shaqaları – onın' keseden gu'zege shekemgi barlıq ıdısları og'an ju'klenedi“».
25 A'lemnin' Jaratqan İyesi bılay deydi: «Sol ku'ni qattı jerge qag'ılg'an qazıq bosap, suwırılıp, qulap tu'sedi. Og'an ilingen barlıq ju'k te alıp taslanadı». Bunı Jaratqan İye ayttı.
