İyshaya 21 bob
1 Ten'iz jag'asındag'ı sho'l tuwralı payg'ambarshılıq so'z: Qubladan du'beleylerdin' du'begeni kibi, Basqınshı da sho'lden, qorqınıshlı jurttan keledi.
2 Mag'an bir qorqınıshlı ayan tu'sti: Satqan satadı, talawshı talaydı. Hu'jim et, Elam! Qamal qıl, Midiya! Ol sebepli bolg'an nalalardı aqırına jetkeremen.
3 Sol sebepli belim shanshıp, Tuwatug'ın hayaldın' tolg'ag'ı kibi, Tolg'aq tuttı meni. Esitkenlerimnen eki bu'gilip, Ko'rgenlerimnen qorqınıshqa tu'stim.
4 Ju'regim ha'wlirip, qorqınısh biylep aldı meni, Imırt jabılıwın ku'tken edim, Biraq ol meni qorqınıshqa saldı.
5 Gilemler to'selip, dasturxan jayılıp, Jep ha'm iship atır eken. Turın'lar, a'skerbasılar, qalqanların'ızdı maylan'lar!
6 İye mag'an bılay dedi: «Barıp, gu'zetshi qoy, ko'rgenin aytsın.
7 Ol sawash arbaların, qos at jegilgen arbag'a mingenlerdi, Eshekke, tu'yege mingenlerdi ko'rse, Olarg'a muqıyatlı tu'rde dıqqat qoysın!»
8 Gu'zetshi bılay dep baqırdı: «Mırzam, ku'n boyı men minarada turaman, Tu'nde de o'z ornımda na'wbetshilikte bolaman.
9 A'ne, olar qos atqa jegilgen arbada kiyatır». Keyin gu'zetshi juwap berip bılay dedi: «Quladı Babilon, quladı! Onın' qudaylarının' barlıq mu'sinleri, Qıyrap jerde jatır».
10 Qırmanda biyday kibi jenshilgen xalqım! A'lemnin' Jaratqan İyesinen, İzraildın' Qudayınan, Esitkenlerimdi sizlerge ayan qıldım.
11 Duma tuwralı payg'ambarshılıq so'z: Birew meni Seirden shaqıradı: – Gu'zetshi, tan' atıwg'a qansha qaldı? Gu'zetshi, qashan tu'n tamam boladı?
12 Gu'zetshi bılay deydi: – Tan' atadı, biraq ja'ne tu'n qaytıp keledi, Eger sorag'ın'ız kelse, qaytıp kelip soray berin'.
13 Arabstan tuwralı payg'ambarshılıq so'z: Dedanlılardın' ka'rwanları! Arabstan tog'aylarında tu'neysizler.
14 Tema jerinin' turg'ınları! Sho'llegenge suw berin'ler, Qashqınlarg'a awqat berin'ler.
15 Olar qılıshtan, jalan'ashlang'an qılıshtan, Kerilgen oq jaydan, g'ıjlag'an urıstan qashıp keledi.
16 İye mag'an bılay dedi: «Bir jıldan keyin, jallang'an isshinin' mu'ddeti kibi, Kedardın' pu'tkil saltanatı aqırına jetedi.
17 Kedardın' sarıjayshı jawıngerlerinen azg'antayı g'ana aman qaladı». İzraildın' Qudayı Jaratqan İye usılay dedi.
