İyshaya 2 bob
1 Nun ulı Eshua Shittimnen jasırın tu'rde eki jansızdı jiberip atırıp, olarg'a: «Barıp, Kenaan jerin, a'sirese Erixonı ko'zden o'tkizin'ler», – dedi. Solay etip, jansızlar jolg'a shıg'ıp, Raxab degen buzıq hayaldın' u'yine keldi ha'm sol jerde qonıp qaldı.
2 Sonda Erixo patshasına: «Elimizdi ko'zden o'tkiziw ushın, usı tu'ni İzrail xalqınan adamlar keldi», – degen xabar jetti.
3 Sonlıqtan Erixo patshası Raxabqa: «Senin' u'yin'e kelgen sol adamlardı shıg'arıp ber. Sebebi olar elimizdi ko'zden o'tkiziw ushın kelgen», – degen xabar jolladı.
4 Al eki adamdı jasırıp qoyg'an Raxab: «Sol adamlardın' mag'an kelgeni ras. Biraq men olardın' qay jerli ekenin bilmegen edim.
5 Gewgim tu'spesten burın, qala da'rwazası jabılayın dep atırg'anda, olar shıg'ıp ketti. Olardın' qay jaqqa ketkenin bilmeymen. İzlerinen da'rhal ketsen'iz, jetip alasızlar», – dedi.
6 Negizinde hayal sol adamlardı tamnın' to'besine shıg'arıp, ol jerge jayıp qoyılg'an zıg'ır bawlarının' astına jasırg'an edi.
7 Al patshanın' adamları bolsa, jansızlardı İordan da'ryasın kesip o'tetug'ın jerge qaray quwıp ketti. Olar qaladan shıg'ıwdan-aq, qala da'rwazası jabıldı.
8 Tamnın' to'besindegi adamlar jatpay turıp, hayal olardın' janına bardı da,
9 olarg'a bılay dedi: – Jaratqan İyenin' bul eldi sizlerge bergenin bilemen. Bizlerdi sizler sebepli qorqınısh biyledi. Elde jasaytug'ın ha'r bir adamnın' ruwxı tu'sip ju'r.
10 O'ytkeni sizler Mısırdan shıqqanın'ızda, Jaratqan İyenin' Qamıs ten'izin aldın'ızda qalay qurg'atıp taslag'anın, İordan da'ryasının' arg'ı jag'ındag'ı amorlardın' eki patshası Sixon menen Ogqa sizler neler islegenin'izdi, olardı qalayınsha pu'tkilley qırıp taslag'anın'ızdı esitken edik.
11 Bulardı esitkenimizde, ruwxımız tu'sip ketti. Sizlerden qorqqanımızdan, hesh kimde hal-da'rman qalmadı. Sebebi sizlerdin' Qudayın'ız Jaratqan İye – joqarıdag'ı aspanda da, to'mendegi jer ju'zinde de Quday.
12 Sizlerge jaqsılıq etkenim sıyaqlı, sizler de menin' u'yishime jaqsılıq etetug'ının'ızg'a Jaratqan İye haqı ant ishin'ler.
13 Ataanamdı, ag'a-inilerimdi, apa-sin'lilerimdi ha'm olardın' u'y-ishlerin o'limnen saqlap, ha'mmemizdi aman qaldıratug'ının'ızdı bildiretug'ın isenimli bir belgi berin'ler.
14 Adamlar og'an: – Eger bul isimizdi a'shkara qılmasan'ız, bizler sizler ushın janımızdı beriwge tayarmız. Jaratqan İye bul jerdi bizlerge bergeninde, sag'an jaqsılıq islep, sadıqlıq ko'rsetemiz, – dedi.
15 U'yi qala diywalında jaylasqanlıqtan, Raxab adamlardı arqan menen a'ynekten to'menge tu'sirdi de,
16 olarg'a: – İzin'izden quwıp ketken adamlar sizlerge dus kelip qalmawı ushın, tawg'a shıg'ın'lar. Olar izlerine qaytıp ketkenge deyin, u'sh ku'n sol jerde jasırınıp turın'lar. Son'ınan jolın'ızdı dawam etersizler, – dedi.
17 Sol adamlar Raxabqa bılay dedi: – Bizler ishtirgen antın'da turıwımız ushın mına na'rseni islewin' sha'rt:
18 Usı elge kirgenimizde, mına qırmızı arqandı bizlerdi tu'sirip jibergen a'ynegin'e baylap qoy. Son'ınan ata-anan'dı, tuwısqanların'dı ha'm a'ken'nin' pu'tkil xojalıg'ın janın'a, o'z u'yin'e jıyna.
19 Senin' u'yin'nin' qapısınan sırtqa shıqqan adam o'z bası ushın o'zi juwap beredi. Bunday adam ushın bizler juwapker emespiz. Biraq eger senin' menen birge u'yin'de bolg'an bir adam ja'bir ko'rse, onın' o'limine bizler juwapker bolamız.
20 egen menen, islerimizdi a'shkara qılsan', onda bizler sen ishtirgen anttan azat bolamız.
21 Hayal olarg'a: – Aytqanın'ızday bolsın, – dedi ha'm olardı jolg'a shıg'arıp salg'annan son', qırmızı arqandı a'ynekke baylap qoydı.
22 Adamlar ol jerden ketip, tawg'a shıqtı ha'm izlerinen quwg'anlar qaytıp ketkenshe, sol jerde u'sh ku'n qaldı. Olardın' izinen quwg'anlar barlıq jerden olardı izlese de, taba almadı.
23 Eki adam izine qaytıw ushın tawdan tu'sti de, da'ryanı kesip o'tip, Nun ulı Eshuanın' janına bardı ha'm baslarınan o'tken ha'mme na'rseni aytıp berdi.
24 Olar Eshuag'a: «Jaratqan İye haqıyqattan da bul pu'tkil jerdi bizlerdin' qolımızg'a tapsırıptı. Ol jerde jasaytug'ın ha'r bir adam bizlerden qorqıp, ruwxı tu'sip ju'r eken», – dedi.
