İyshaya 19 bob
1 Mısır tuwralı payg'ambarshılıq so'z: Mine, Jaratqan İye ushqır bultqa minip alıp, Mısırg'a keledi. Onın' aldında Mısır butları titireydi, Mısırlılardın' ruwxları tu'sip ketedi.
2 Jaratqan İye bılay deydi: «Men mısırlını mısırlıg'a qarsı ko'teremen, Tuwısqan tuwısqang'a, qon'sı qon'sıg'a, qala qalag'a, Patshalıq patshalıqqa qarsı urısadı.
3 Mısırlılardın' ruwxı tu'sedi, Niyetlerin pushqa shıg'araman. Olar butlarınan, o'li ruwxlarınan, A'rwaqlardı ha'm ruwxlardı shaqırıwshılardan ma'sla'ha't soraydı.
4 Men mısırlılardı zalım xojayınlardın' qolına beremen, Olardın' u'stinen rehimsiz patsha hu'kim su'redi». Bunı İye, A'lemnin' Jaratqan İyesi aytadı.
5 Nildin' suwı qurıp, Tarmaqları tartılıp, qurg'ap qalar.
6 Onın' kanalları pataslanar. Mısırdag'ı Nildin' tarmaqları qurıp, kewip qalar, Jekenler ha'm qamıslar shirip keter.
7 Nildin' jag'asındag'ı basqa o'simlikler, Nil do'geregindegi atızlardag'ı eginler quwrap, Samal menen ushıp, joq bolar.
8 Balıqshılar dad salıp, zar jılar, Nilge qarmaq salıp, ku'n ko'rip otırg'anlar, Suwg'a aw taslag'anlar tu'skinlikke tu'ser.
9 Zıg'ırdın' qabıg'ına islew beriwshiler, Jaqsı zıg'ır tawar toqıwshılar uyatqa qalar.
10 Kiyim toqıwshılar qayg'ıg'a batıp, Jallanba jumısshılar tu'skinlikke tu'ser.
11 Soannın' hu'kimdarları qanday aqılsız? Faraonnın' dana ken'esshileri aqmaq ken'es beredi. Sizler qalayınsha faraong'a: «Men danıshpannın' ulıman, A'yyemgi patshalar na'silinenmen», – dey alasız.
12 Ha'y faraon, qa'ne sol dana adamların'? A'lemnin' Jaratqan İyesi Mısırg'a qarsı neni maqset qılg'anın, Olar sag'an aytıp bersin, bildirsin.
13 Soan hu'kimdarları aqıldan adastı! Nof hu'kimdarları aldandı! Mısırdı o'z urıw basshıları joldan adastırdı.
14 Jaratqan İye olarg'a aqılınan adastırıw ruwxın jiberdi, O'z qusıg'ına tayıp jıg'ılg'an ma'sku'nem qanday bolsa, Olar da Mısırdı ha'mme isinde adastırdı.
15 Bas ta, quyrıq ta, palma shaqası da, qamıs ta, Mısır ushın hesh na'rse qıla almadı.
16 Sol ku'ni mısırlılar hayal adamg'a uqsap qalıp, A'lemnin' Jaratqan İyesi o'zlerine qarsı qol ko'termey atırıp, qorqıp, titiresedi.
17 Yahuda eli mısırlılarg'a qa'wip tuwdıradı. Yahudanın' atı atalg'anda, A'lemnin' Jaratqan İyesinin' Mısırg'a qarsı shıg'arg'an qararınan ha'r bir mısırlı qorqatug'ın boladı.
18 Sol ku'ni Mısırda bes qala kenaan tilinde so'ylep, A'lemnin' Jaratqan İyesine sadıq bolıwg'a ant ishedi. Olardın' biri Quyash qalası dep ataladı.
19 Sol ku'ni Mısırdın' ortasına Jaratqan İyege arnap qurbanlıq orın qurılıp, eldin' shegarasına Og'an arnalg'an estelik tas qoyıladı.
20 Bul A'lemnin' Jaratqan İyesi ushın Mısırda bir belgi ha'm gu'walıq boladı. Olar eziwshiler sebepli Jaratqan İyege jalbarıng'anda, Jaratqan İye mısırlılarg'a qutqarıwshı jiberip, g'amxorlıq qıladı ha'm azat etedi.
21 Jaratqan İye O'zin mısırlılarg'a tanıtadı ha'm sol ku'ni mısırlılar Jaratqan İyeni tanıydı. Olar qurbanlıqlar ha'm g'a'lle sadaqaları menen Jaratqan İyege sıyınadı, Og'an wa'deler berip, olardı orınlaydı.
22 Jaratqan İye Mısırdı jazalaydı ha'm jazalag'annan keyin O'zi olarg'a shıpa beredi. Mısırlılar Jaratqan İyege ju'z buradı, Jaratqan İye de olardın' jalbarınıwlarına qulaq salıp, olarg'a shıpa beredi.
23 Sol ku'ni Mısırdan Assiriyag'a ken' jol ashıladı. Assiriyalılar Mısırg'a, mısırlılar Assiriyag'a baradı. Mısırlılar assiriyalılar menen birge sıyınadı.
24 Sol ku'ni İzrail Mısır menen Assiriya qasındag'ı u'shinshi el bolıp, olar arqalı du'nya jarılqanadı.
25 A'lemnin' Jaratqan İyesi: «Xalqım Mısır, O'z qolımnın' isi bolg'an Assiriya ha'm miyrasım İzrail jarılqansın», – dep olarg'a aq pa'tiyasın beredi.
