İyshaya 18 bob
1 Kush da'ryalarının' arg'ı jag'ında jasaytug'ın, Qanatların suwıldatatug'ın el, ha'siret shegesiz!
2 Sol el qamıstan islengen qayıq penen, Nil da'ryası arqalı o'z elshilerin jiberedi. Ha'y, ju'yrik xabarshılar! Jerleri da'ryalar menen bo'lingen, Uzın boylı, tegis terili milletke, Jaqın-alısqa qorqıw salg'an xalıqqa, Ku'shli ha'm basqınshı milletke qaytın'lar.
3 Ha'y sizler, pu'tkil du'nya turg'ınları, Jer betinde jasawshılar! Taw basında urıs jalawı ko'terilse, qaran'lar, Ka'rnay shalıng'anda, esitin'ler.
4 Jaratqan İye mag'an bılay dedi: «Ku'nnin' ha'wirli ıssısı sıyaqlı, Jıyın-terim waqtındag'ı shıqlı bult sıyaqlı, Men O'z ma'kanımnan tınısh qarap turaman».
5 Hasıl jıynalmastan aldın, Gu'llep bolıp, gu'l ju'zimge aylang'anda, Ol bag' qayshısı menen putaqlardı kesip, Jayılg'an shaqalardı shawıp, ılaqtıradı.
6 Ha'mmesi tawlardag'ı jırtqısh quslarg'a, Jerdegi jabayı haywanlarg'a qaladı. Olar jazda jırtqısh quslarg'a, Qısta jabayı haywanlarg'a jem boladı.
7 Sol waqıtta jerleri da'ryalar menen bo'lingen, Uzın boylı, tegis terili millet, Jaqın-alısqa qorqıw salg'an xalıq, Ku'shli ha'm basqınshı millet, A'lemnin' Jaratqan İyesine, A'lemnin' Jaratqan İyesinin' atı bolg'an jerge, Sion tawına sawg'alar alıp keledi.
