İyshaya 17 bob
1 Damask tuwralı payg'ambarshılıq so'z: Mine, Damask endi qala dep sanalmas, Ol qarabaqanag'a aylanadı.
2 Aroer qalaları ta'rk etiledi, Su'riwler jatatug'ın jaylawg'a aylanıp, Olardı u'rkitetug'ın hesh kim bolmas.
3 Efrayımda qorg'anlı qala qalmas, Damaskte patshalıq bolmas, Aramnın' aman qalg'anları, İzraildın' saltanatı kibi bolar, Deydi A'lemnin' Jaratqan İyesi.
4 Sol ku'ni Yaqıptın' dan'qı o'sher, Maylı denesi azıp-tozar.
5 Oraqshılardın' da'ndi jıynap alg'anınday, O'z qolları menen masaqtı terip alg'anınday boladı. Ol Refaim oypatlıg'ında birewdin' masaqlardı jıynap alg'anına uqsaydı.
6 Za'ytu'n ag'ashının' miywesi qag'ıp alıng'annan son', En' to'besinde eki-u'sh za'ytu'n, O'nimdar shaqasında to'rt-bes za'ytu'n qalg'anı sıyaqlı, Tek bir neshe adam g'ana aman qaladı. Bunı İzraildın' Qudayı Jaratqan İye aytadı.
7 Sol ku'ni xalıq Jaratqang'a na'zerin tigedi, Ko'zleri İzraildın' Muxaddesin ko'redi.
8 Artıq olar o'zleri islegen qurbanlıq orıng'a qaramaydı. Qolları menen soqqan kiyeli ag'ashlarına, Tu'tetki tu'tetiletug'ın orınlarg'a na'zer salmaydı.
9 Sol ku'ni olardın' bekinisli qalaları, İzraillılardan qashqan xiwler menen amorlardın', Ta'rk etken qalaları sıyaqlı sho'lge aylanadı.
10 Sen O'z Qutqarıwshı Qudayın'dı umıttın', O'z Qorg'anın' bolg'an Jartastı eske almadın'. Sonlıqtan unamlı o'simlikler eksen' de, Basqa jaqtan alıp kelip, ju'zim na'llerin otırg'ızsan' da,
11 Olardı ekken ku'ni o'sirsen' de, Otırg'ızıp baslag'an ku'ni azanda gu'lletsen' de, Ha'stelik ha'm da'rt ku'ni kelgende, Jıynap alar daqıl bolmas.
12 Ko'p milletlerdin' shuwıldısı, Ten'izdin' shuwıldısınday shuwıldaydı! Xalıqlardın' gu'wildisi, Ku'shli tolqınlar kibi gu'wildeydi!
13 Milletler ku'shli tolqınlardın' gu'wildisi kibi gu'wildesin, Biraq Quday olardı a'shkaralag'anda, To'belerde samal ushırg'an qawıq kibi, Uzaqlarg'a qashıp ketedi. Du'beley ushırg'an qan'baqtay aylanadı.
14 Keshki waqıt, mine, qorqınısh! Azang'a taman olar joq bolıp keter! Bizlerdi tonag'anlardın' payı, Bizlerdi talan-taraj qılg'anlardın' ta'g'diri usınday boladı.
