1 Sho'l jolı arqalı Seladan, Qız Sionnın' tawına, Eldin' hu'kimdarlarına, Qozılardı sıyg'a jiberin'.
2 Moab hayalları uyalarınan ılaqtırıp taslang'an, Qaltırap qanat qaqqan quslarday, Arnon sayının' o'tkelinde ju'rer.
3 Olar Yahuda xalqına bılay deydi: «Bizge ken'es ber, qarar qabıl et, Ku'n ortasındag'ı sayan'dı, Tu'n sıyaqlı bizge tu'sir. Quwılg'anlardı jasır, Qashaqlardı qolg'a berme.
4 Moabtan quwılg'anlar, Ma'kan bassın aran'ızda, Qırg'ın qılıwshılardan, Jasırınatug'ın pana bol!» Eziwshiler joq bolg'anda, Wayranshılıq toqtap, Talanshılar elden g'ayıp bolar.
5 Taxt su'yispenshilik penen bekitiler, Onda sadıqlıq penen otırar hu'kimdar, Ol Dawıttın' xojalıg'ınan kelip shıg'ar, A'dalatlıqtı izler, a'dillikti ju'zege asırıwg'a asıg'ar.
6 Moabtın' ta'kabbirligi, Asa menmenligi, dan'qparazlıg'ı, Ko'kirekligi ha'm surbetligi haqqında esittik. Biraq olar bosqa maqtanadı.
7 Sonın' ushın moablılar zar jılasın, Ha'mmesi birge Moab ushın nala sheksin. Kir-Xaresettin' kishmishlerin qumartıp, Qayg'ırıp, joqlaw aytın'.
8 Xeshbonnın' egin maydanları, 6 Sibmanın' ju'zimzarları qurıp qaldı, Milletlerdin' ko'semleri, Jaqsı ju'zim ag'ashları basqılandı, Bul ag'ashlar Yazerge jetip, Sho'lge deyin jayıldı. Shaqaları uzayıp, Ten'izden de asqan edi.
9 Sonlıqtan Sibmanın' ju'zimzarları ushın, Yazer jılag'anday, men de jılayman. Xeshbon ha'm Elale! Sizlerdi ko'z jasım menen suwg'araman. Sebebi miywe pisken waqıttag'ı, Da'n orag'ı waqtındag'ı oyın-ku'lkin'iz toqtadı.
10 Shadlıq ha'm quwanısh bag'lardı ta'rk etti, Ju'zimzarlarda hesh kim shawqımlaspas, Qosıq ta aytpas, Ju'zim sıg'ılatug'ın shuqırlarda ju'zim sıg'ılmas, Quwanıshlı shawqımlarg'a shek qoydım.
11 Ju'regim Moab ushın, Janım Kir-Xeres ushın lira sıyaqlı nala sheger.
12 Eger Moab o'zlerinin' sıyınıw ornında payda bolıp, O'zlerin talıqtırsa da, Olar duwa etiw ushın o'zlerinin' muxaddes orınlarına kelse de, Bul hesh qanday payda bermes.
13 Bul Jaratqan İyenin' Moab haqqında a'lle qashan aytqan so'zi edi
14 Biraq endi Jaratqan İye bılay deydi: «Jallang'an isshinin' mu'ddeti kibi, u'sh jıldan keyin, Moabtın' saltanatının' ha'm ko'p sanlı xalqının' abırayı to'giledi. Xalqının' aman qalg'anları ju'da' az ha'm ha'lsiz boladı».
