İyshaya 13 bob

Basıp alınatug'ın jerler (1-7),İordan da'ryasının' shıg'ısındag'ı jerler (8-14),Ruben urıwına berilgen jerler (15-23),Gad urıwına berilgen jerler(24-28),Menashshe urıwının' yarımına berilgen shıg'ıstag'ı jerler (19-33).

¹ Eshua qartayıp, biraz jasqa barıp qalg'an waqtında, Jaratqan İye og'an bılay dedi: – Sen qartayıp, biraz jasqa barıp qaldın'. Biraq basıp alınatug'ın jerler ele ju'da' ko'p.

² Sol qalg'an jerler mınalar: pu'tkil filist ha'm geshur xalıqları jasaytug'ın aymaqlar,

³ yag'nıy kenaanlılarg'a tiyisli bolıp esaplang'an Mısırdın' shıg'ıs ta'repindegi Shixor da'ryasınan arqadag'ı Ekron shegaralarına shekem sozılg'an jerler – bular filist xalqının' bes hu'kimdarına tiyisli Gaza, Ashdod, Ashkelon, Gat ha'm Ekron qalaları ha'm qublada aw xalqının' jerleri.

⁴ Ja'ne de, sidonlılarg'a tiyisli Ara degen jerden baslap, Afekke, yag'nıy Amor shegarasına shekemgi pu'tkil Kenaan jerleri.

⁵ Tag'ı geballılardın' jerleri ha'm Xermon tawı etegindegi BaalGadtan Lebo-Xamatqa shekem sozılg'an shıg'ıs ta'reptegi pu'tkil Lebanon jerleri.

⁶ Lebanonnan Misrefot-Mayımg'a shekem sozılg'an tawlı jerde jasaytug'ınlardı, yag'nıy barlıq sidonlılardı izraillılardın' aldınan quwıp shıg'araman. Sag'an buyırg'anımday, bul jerlerdi izraillılarg'a mu'lik etip bo'listirip ber.

⁷ Endi bul jerlerdi tog'ız urıwg'a ha'm Menashshe urıwının' yarımına mu'lik etip bo'listirip ber.

⁸ Menashshe urıwının' basqa yarımı menen Ruben ha'm Gad urıwları İordan da'ryasının' shıg'ısındag'ı jerlerdi u'les etip aldı. Olarg'a bul jerlerdi Jaratqan İyenin' qulı Muwsa bergen edi.

⁹ Sol jerler Arnon da'ryasının' jag'asındag'ı Aroerden ha'm oypatlıqtın' ortasındag'ı qaladan baslanıp, Dibong'a deyin sozılg'an pu'tkil Medeba ken'isligin o'z ishine aladı.

¹⁰ Ja'ne de, onın' ishine Xeshbonda hu'kimdarlıq etken amorlardın' patshası Sixonnın' ammon xalqının' shegarasına deyin sozılg'an pu'tkil qalaları,

¹¹ Gilad u'lkesi ha'm geshurlılar menen maaxalılardın' jerleri, pu'tkil Xermon tawı ha'm Salkag'a deyingi pu'tkil Bashan jerleri kiredi.

¹² Ja'ne de, en' son'g'ı refalardın' biri bolg'an, Ashtarot ha'm Edreyde hu'kimdarlıq etken Bashan patshası Ogtın' qalg'an jerlerinin' barlıg'ı da kiredi. Muwsa refa xalqın jen'iliske ushıratıp, olardı quwıp jibergen edi.

¹³ İzraillılar geshurlılar menen maaxalılardı quwıp jibermedi. Olar bu'gin de izraillılardın' arasında jasap kelmekte.

¹⁴ Muwsa tek Lebiy urıwına g'ana jerden u'les bermedi. Jaratqan İyenin' Muwsag'a bergen buyrıg'ı boyınsha, İzraildın' Qudayı Jaratqan İyege berilgen qurbanlıqlardın' bir bo'legi lebiylilerdin' u'lesi boladı.

¹⁵ Tiyre sanına qaray, Muwsanın' Ruben urıwına bergen jerleri mınalar:

¹⁶ Arnon da'ryasının' jag'asındag'ı Aroerden ha'm oypatlıqtın' ortasındag'ı qaladan baslanıp, pu'tkil Medeba ken'isligi, 17Xeshbon ha'm ken'isliktegi og'an tiyisli mına qalalardın' ha'mmesi: Dibon, Bamot-Baal, Beyt-BaalMeon,

¹⁷ Xeshbon ha'm ken'isliktegi og'an tiyisli mına qalalardın' ha'mmesi: Dibon, Bamot-Baal, Beyt-BaalMeon,

¹⁸ Yahasa, Kedemot, Mefaat,

¹⁹ Kiryatayım ha'm Sibma, oypatlıqtag'ı to'beshikte qurılg'an Seret-Shaxar,

²⁰ Beyt-Peor, Pisga tawının' janbawırları, Beyt-Eshimot,

²¹ ken'isliktegi barlıq qalalar ha'm Xeshbonda hu'kimdarlıq etken amor patshası Sixonnın' pu'tkil eli. Muwsa Sixondı ha'm og'an tiyisli jerlerde jasaytug'ın Midyan ko'semleri bolg'an Ewiy, Rekem, Sur, Xur ha'm Rebanı jen'iliske ushıratqan edi.

²² İzraillılar o'ltirilgenlerge qosıp, Beor ulı palker Bilamdı da qılıshtan o'tkizdi.

²³ Ruben urıwının' jeri İordan da'ryasına shegaralas edi. Tiyre sanına qaray, olarg'a mu'lik etip berilgen awıl ha'm qalalar usılar edi.

²⁴ Tiyre sanına qaray, Muwsa Gad urıwına mına jerlerdi berdi:

²⁵ Yazer jeri, pu'tkil Gilad qalaları, Rabba jaqınındag'ı Aroerge deyin sozılg'an ammonlarg'a tiyisli bolg'an jerlerdin' yarımı,

²⁶ Xeshbonnan Ramat-Mispe ha'm Betonimge, Maxanayımnan Lo-Debarg'a deyingi jerler,

²⁷ İordan oypatlıg'ındag'ı Beyt-Haram, Beyt-Nimra, Sukkot, Safon, Xeshbon patshası Sixonnın' jerlerinen awısqan bo'legi, Kinneret ko'linin' qubla ta'repine deyin sozılg'an İordan da'ryasının' shıg'ıs ta'repi.

²⁸ Tiyre sanına qaray, Gad urıwına mu'lik etip berilgen awıl ha'm qalalar usılar edi.

²⁹ Tiyre sanına qaray, Muwsa Menashshe urıwının' yarımına mına jerlerdi berdi:

³⁰ olar Maxanayımnan baslanıp, Bashan patshası Ogtın' eli bolg'an pu'tkil Bashandı ha'm Bashanda Yairge tiyisli bolg'an alpıs qalanın' ha'mmesin o'z ishine aldı.

³¹ Ja'ne de, Giladtın' yarımın, Bashan patshası Ogtın' paytaxt qalaları bolg'an Ashtarot ha'm Edreydi o'z ishine aldı. Bul jerler Menashshenin' ulı Maxirdin' urpaqlarının' yarımına tiyre sanına qaray berilgen edi.

³² Muwsanın' Erixonın' shıg'ısında, İordan da'ryasının' arg'ı jag'asındag'ı Moab tegisliginde bo'lip bergen jerleri usılar edi.

³³ Biraq Lebiy urıwına jerden u'les berilmedi. Jaratqan İyenin' aytqanınday, olardın' u'lesi İzraildın' Qudayı Jaratqan İyenin' O'zi boladı.