İyshaya 12 bob
1 İzraillılar İordan da'ryasının' shıg'ısın, İordan tegisliginin' pu'tkil shıg'ıs ta'repi menen Arnon da'ryasınan Xermon tawına shekem bolg'an jerlerdi qolg'a kirgizip, mına patshalardı jen'iliske ushıratqan edi:
2 olardın' biri Xeshbonda jasag'an amorlardın' patshası Sixon bolıp, onın' patshalıg'ı Arnon da'ryasının' jag'asındag'ı Aroer qalasın ha'm sol da'ryanın' ortasınan baslanatug'ın ammon xalqının' shegarası bolg'an Yabboq da'ryasına deyingi jerlerdi, yag'nıy Giladtın' yarımın o'z ishine alatug'ın edi.
3 İordan tegisliginin' shıg'ıs ta'repi de og'an tiyisli edi. Bul jer Kinneret ko'linen Tegislik ko'line, yag'nıy O'li ten'izge deyin sozılg'an jerlerdi, ja'ne de, Beyt-Eshimotqa ha'm qubladag'ı Pisga tawının' janbawırlarına deyingi jerlerdi o'z ishine alatug'ın edi.
4 Ekinshisi Bashan patshası Og bolıp, ol en' son'g'ı refalardın'* biri edi ha'm Ashtarot penen Edreyde hu'kimdarlıq etti.
5 Ol Xermon tawına, Salkag'a, geshurlılar menen maaxalılardın' shegaralarına deyin sozılg'an pu'tkil Bashang'a ha'm Xeshbon patshası Sixonnın' shegarasına deyin sozılg'an Giladtın' yarımına hu'kimdarlıq etetug'ın edi.
6 Jaratqan İyenin' qulı Muwsa ha'm izraillılar usı patshalardı jen'iliske ushırattı. Sonda Jaratqan İyenin' qulı Muwsa olardın' jerlerin Ruben ha'm Gad urıwları menen Menashshe urıwının' yarımına mu'lik qılıp berdi.
7 Lebanon oypatlıg'ındag'ı Baal-Gadtan Seirge deyin sozılg'an Xalaq tawına shekemgi İordan da'ryasının' batısındag'ı jerlerde jasag'an patshalardı Eshua ha'm izraillılar jen'iliske ushıratqan edi. Olardın' jerlerin Eshua İzrail urıwlarına mu'lik qılıp bo'lip bergen edi.
8 Yag'nıy, Eshua tawlı jerlerdi, batıstag'ı taw eteklerin, İordan tegisligin, taw janbawırlarındag'ı jerlerdi, sho'ldi ha'm Negebti İzrail urıwları arasında mu'lik qılıp bo'listirdi. Bul jerlerde xett, amor, kenaan, periz, xiw ha'm ebus xalıqları jasaytug'ın edi. İzrail jen'iliske ushıratqan patshalar mınalar edi:
9 Erixo patshası, Beyt-Elge jaqın jerdegi Ay qalasının' patshası,
10 Erusalim patshası, Xebron patshası,
11 Yarmut patshası, Laxish patshası,
12 Eglon patshası, Gezer patshası,
13 Debir patshası, Geder patshası,
14 Xorma patshası, Arad patshası,
15 Libna patshası, Adullam patshası,
16 Makkeda patshası, Beyt-El patshası,
17 Makkeda patshası, Beyt-El patshası,
18 Afek patshası, Lashsharon patshası,
19 Madon patshası, Xasor patshası,
20 Shimron-Meron patshası, Axshaf patshası,
21 Taanax patshası, Megiddo patshası,
22 Kedesh patshası, Karmeldegi İoqneam patshası,
23 To'beshikli Dor elinin' patshası, Galiladag'ı Goyım patshası,
24 ha'm Tirsa patshası. Barlıg'ı bolıp otız bir patsha.
