Wazshı 1 bob
1 Bular Dawıttın' ulının', Erusalimde patshalıq etken Wazshının' so'zleri:
2 «Biyhuda, biyhuda, ha'mmesi biyhuda!» – deydi Wazshı.
3 Quyash astında islegen barlıq miynetinen Adam ne payda tabar?
4 Bir a'wlad keter, bir a'wlad keler, Al du'nya ma'n'gige usılay qala berer.
5 Ku'n shıg'ar, ku'n batar, Keyin ol shıqqan ornına qaytıwg'a asıg'ar.
6 Samal qublag'a eser, keyin arqag'a aylanar. Ol aylanıp-aylanıp esip, Qaytıp o'z jolına tu'ser.
7 Barlıq da'ryalar ten'izge quyar, Biraq ten'iz hesh tolmas. Da'ryalar aqqan jaqqa qaytadan ag'a berer.
8 Ha'mme na'rse jalıqtıradı, Adam olardı so'z benen jetkere almas. Ko'z ko'riwden, Qulaq esitiwden toymas.
9 Aldın ne bolg'an bolsa, ja'ne bolar. Ne qılıng'an bolsa, ja'ne qaytalanar. Quyash astında hesh qanday jan'a na'rse joq.
10 Qanday da bir na'rse bar ma: «Qaran'lar, mınaw jan'alıq-g'o», – dep ayta alg'anday? Biraq ol na'rse de a'yyemnen, bizlerden a'sirler aldın bar edi.
11 Burın bolg'anlar eske alınbas, Keleshekte bolatug'ınlar da olardan keyingiler arasında eske alınbas.
12 Men, Wazshı, Erusalimde İzrail patshası edim.
13 O'zimdi aspan astında islenip atırg'an na'rselerdin' ha'mmesin danalıq penen izertlewge ha'm u'yreniwge bag'ıshladım. Qudaydın' adam balasına bergen ju'gi qanday awır!
14 Men quyash astında islenip atırg'an barlıq islerdi ko'rdim: olardın' ha'mmesi biyhuda, ha'mmesi samaldın' izinen quwg'ang'a uqsaydı eken.
15 Qıysayg'an mort na'rseni du'zetip bolmas, Joq na'rseni sanap bolmas.
16 Men o'zime o'zim bılay dedim: «Mine, men ullılıqta ha'm danalıqta Erusalimde o'zimnen aldın biylik etkenlerdin' ha'mmesinen de ilgerilep, ozıp kettim. Mol danalıq ha'm bilimdi iyelep aldım» .
17 Men o'zimdi danalıqtı biliwge, ja'ne aqılsızlıq penen aqmaqlıqtı biliwge bag'ıshladım. Sonda bunın' da samaldın' izinen quwg'ang'a uqsaytug'ının tu'sindim.
18 Ko'p bilgen sayın, qapashılıq ta ko'beyer. Ko'p tu'singen sayın, da'rt te asıp barar.
