Hikmetleri 9 bob
1 Danalıq o'zine u'y qurıp aldı, Onın' jeti su'tinin jonıp qoydı.
2 Ol malların soyıp, sharap tayarlap, Dasturxan jaydı.
3 Ol o'z xızmetshi hayalların jollap, Qalanın' biyik jerlerinde jar saldırdı:
4 «Kim sada bolsa, berman kelsin!» Al aqıl-esi kemlerge bılay dedi:
5 «Kelin'ler, nanımnan jep, Men tayarlag'an sharaptan ishin'ler.
6 Nadanlıqtı taslap, jasan'lar, Aqıl-parasattın' jolınan ju'rin'ler».
7 Surbetke na'siyat bergen masqara bolar, Zalımdı a'shkaralag'ang'a min tag'ılar.
8 Surbetti a'shkaralama, ol seni jek ko'rip qalar, Dananı a'shkarala, ol seni su'yip qalar.
9 Danag'a u'yret, ol ja'ne de danaraq bolar, A'dilge ta'lim ber, ol bilimin arttırar.
10 Jaratqan İyeden qorqıw – bul danalıqtın' bası, Muxaddes Qudaydı tanıw – bul aqıl-parasat.
11 Men – danalıq arqalı o'mirin' uzayar, Jasın'a jas qosılar.
12 Eger dana bolsan', o'zin'e payda, Surbet bolsan', ja'birin o'zin' tartarsan'.
13 Aqmaqlıq – g'awg'alı hayal, Ol nadan, hesh na'rseni bilmeydi.
14 Ol u'yinin' esigi aldında, Qalanın' biyik jerinde otırıp alıp,
15 Joldan o'tip baratırg'anlardı, O'z jolı menen ketip baratırg'anlardı shaqırıp:
16 «Kim sada bolsa, berman kelsin!» – deydi. Al jarımeslerge bılay deydi:
17 «Urlap ishilgen suw ju'da' tatlı, Jasırıp jelingen nan sonday mazalı».
18 Biraq sadalar bilmeydi burın shaqırılg'anlardın', O'liler ma'kanının' tu'binde o'lip jatırg'anın.
