1 Balam, so'zlerimdi esin'de tut, Buyrıqlarımdı ju'regin'de saqla.
2 Buyrıqlarıma a'mel qıl, sonda jaqsı jasaysan', Na'siyatımdı ko'z qarashıg'ınday asıra.
3 Olardı ju'zik kibi barmag'ın'a tag'ıp al, Ju'regin'e oyıp jazıp qoy.
4 Danalıqqa: «Sen menin' apamsan'», – dep ayt, Tu'sinikti tuwısqanım, dep ata.
5 Olar seni buzıq hayaldan, Jezo'kshe hayaldın' maylı tilinen qorg'aydı.
6 Bir ku'ni u'yimnin' a'yneginen, Terezeden sırtqa qaradım.
7 Sada jaslardın' arasında, Aqılı tolmag'an jas jigitti ko'rip qaldım.
8 Ol ko'sheni hayal jasaytug'ın mu'yeshke jaqın jerden kesip o'tip, Sol hayaldın' u'yine aparatug'ın jol menen ketti.
9 Bul ımırt jabılg'an keshki waqıt bolıp, Tu'ngi qaran'g'ılıq sho'kken edi.
10 Sonda buzıqlar sıyaqlı kiyingen hiyleker hayal, Aldınan shıg'ıp, jigitti ku'tip aldı.
11 Ol u'yinde turmaytug'ın, Wayraqı ha'm ju'wensiz bolıp,
12 Birese ko'shede, birese maydanda, Mu'yeshlerde jigitlerdi awlap turadı.
13 Ol jigitti uslap alıp, su'ydi, Beti bu'lk etpey og'an bılay dedi:
14 «Bu'gin tatıwlıq qurbanlıg'ın berip, Bergen wa'demdi orınladım.
15 Sonlıqtan seni ku'tip alıwg'a shıqtım, Seni izlep, mine, tawıp ta aldım!
16 Tu'rli ren'li Mısır tawarlarınan, To'segimdi qaplap, to'sedim.
17 Jataq jayıma xosh iyisli mirra, Aloe ha'm koritsa septim.
18 Qa'ne kel, tan' atqansha, muhabbat la'zzetin tatıp, Onnan ra'ha'tleneyik.
19 U'yde ku'yewim joq, Ol alıs saparg'a ketti.
20 Ol gu'mis tolı shıjlanın da alıp ketti, Ay tolg'ansha qaytıp kelmeydi».
21 Hayal jıllı so'zler menen jigitti aylandırıp, Maylı tili menen joldan urdı.
22 Sol waqıtta-aq, jigit og'an erip ketti. Jigit soyılıwg'a baratırg'an bug'ag'a, Duzaqqa ayaq basıp atırg'an suwıng'a uqsar edi.
23 Oq bawırın tesip o'tpegenshe, Duzaqqa taslang'an qus sıyaqlı, O'limge baratırg'anın bilmes edi.
24 Solay eken, balalar, meni tın'lan'lar, Aytqan so'zlerime qulaq salın'lar!
25 Ju'regin'iz sonday hayaldın' jolına burılmasın, Onın' soqpaqları boylap adasıp ju'rmen'ler.
26 Ol ko'plerdi jaradar etip jıqtı, Sansız adamlar onın' qolınan qaza taptı.
27 Onın' u'yi o'liler ma'kanına jeteleytug'ın, O'limge alıp tu'setug'ın jol.
