Hikmetleri 4 bob
1 Balalarım, a'ken'izdin' na'siyatlarına qulaq salın'! Aqıl-parasattı iyelewge itibar berin.
2 Men sizlerge jaqsı ta'lim beremen, U'yretkenlerimnen ju'z burman'lar.
3 Men de a'kemnin' u'yinde bala boldım, Ko'zinin' qarası, anamnın' jalg'ızı edim.
4 A'kem mag'an u'yretip, bılay der edi: «So'zlerimdi ju'regin'e bekkem jayla, Buyrıqlarımdı orınla, sonda jaqsı jasaysan'.
5 Danalıqtı ha'm aqıl-parasattı iyele, So'zlerimdi umıtpa, olardan ju'z burma.
6 Danalıqtan ayırılma, ol seni qorg'aydı, Onı su'y, ol seni aman saqlaydı.
7 En' baslısı – danalıq, danalıqtı iyele, Bar iyeligin'di berip bolsa da, aqılg'a iye bol.
8 Onı joqarı bahala, ol seni ma'rtebeli qıladı, Og'an jabısıp alsan', ol seni abırayg'a eristiredi.
9 Danalıq basın'a a'jayıp gu'l shen'ber, Sawlatlı bir taj kiydiredi».
10 Balam, tın'la ha'm so'zlerimdi qabıl et, Sonda o'mir jasın' uzaq boladı.
11 Men sag'an danalıq jolın u'yrettim, Seni tuwrı soqpaqlardan jeteledim.
12 Ju'rgenin'de, adımın' tosqınlıqqa ushıramaydı, Juwırg'anın'da su'rnikpeysen'.
13 Na'siyatıma bekkem a'mel qıl, onnan ayırılma, Onı saqla, ol – senin' o'mirin'.
14 Nahaqlardın' soqpag'ınan, Jawızlardın' jolınan ju'rme.
15 Onnan bas tart, ol joldan ju're go'rme, Onnan awlaq bolıp, burılıp ket.
16 Olar jawızlıq islemese, uyıqlay almaydı, Birewdi qulatpasa, uyqısı qashadı.
17 Olar nızamsızlıq arqalı nan jep, Jawızlıq arqalı sharap ishedi.
18 A'dildin' jolı tan' shug'lasına uqsaydı, Ol tu'ske deyin jarqırag'an sayın jarqıraydı.
19 Zalımnın' jolı tu'nekke uqsaydı, Olar nege su'rnigip qulaytug'ının bilmeydi.
20 Balam, so'zlerime dıqqat qoy, Aytqanlarıma qulaq tu'r.
21 So'zlerimdi na'zerin'nen qashırma, Olardı ju'rek to'rinde saqla.
22 Olar, o'zin tapqanlarg'a o'mir sıylaydı, Pu'tkil denege densawlıq beredi.
23 En' baslısı, bar ku'shin' menen ju'regin'di qorg'a, Ol o'mir bulag'ı.
24 Awzın'nan jalg'an so'z shıqpasın, Tilin'di o'tirik so'zden tıy.
25 Ko'zlerin' alg'a tuwrı qarasın, Na'zerin' aldıg'a tigilgen bolsın.
26 Qa'demin'di oylap bas, Pu'tkil jolların' bekkem bolsın.
27 On'g'a da, solg'a da qayırılma, Ayag'ın'dı jawızlıqtan awlaq tut.
