Hikmetleri 30 bob
1 Mınalar Yake ulı Agurdın' İtielge, İtiel menen Uxalg'a aytqan hikmetli so'zleri:
2 «Rasında da, men adamlar arasındag'ı en' nadanı ekenmen, Adamg'a ta'n aqıl da joq mende.
3 Danalıqtı u'yrengen de emespen, Muxaddes Qudaydı tanımayman da.
4 Kim bir ret bolsa da, ko'klerge ko'terilgen yamasa to'men tu'sken? Kim alaqanına samaldı jıynap alg'an? Kim suwdı kiyimine orap alg'an? Kim jerdin' shegin ornatqan? Onın' atı kim? Ulının' atı kim? Bilsen', mag'an ayt!
5 Qudaydın' ha'r bir so'zi haq, Ol O'zin panalaytug'ınlardın' qalqanı.
6 Onın' so'zlerine hesh na'rse qospa, Qossan', ol seni a'shkaralar, o'tirikshi bolıp qalarsan'.
7 Quday, men Sennen eki na'rse sorayman, O'lmesimnen burın solardı bershi:
8 Mıljın' so'zdi ha'm o'tirikti mennen awlaq qıl, Jarlılıq ta, baylıq ta bermeshi mag'an, Tek bere go'r ku'ndelikli nanımdı.
9 Toyınıp ketip, Sennen bas tartıp: „Jaratqan İye degen kim o'zi?“ – dep aytpayın, Jarlılanıp qalıp urlıq islep, Senin' atın'a isnat keltirip ju'rmeyin.
10 Xızmetkerin xojayınına jamanlama, Bolmasa, ol seni g'arg'ap, jazasın tartarsan'.
11 Sonday a'wlad bar, a'kesin g'arg'ar, Anasına da alg'ıs aytpas.
12 Sonday a'wlad bar, o'zin taza sanar, Ha'tte, qusıg'ınan tazarmag'an bolsa da.
13 Sonday a'wlad bar, ta'kabbirlenip bag'ar, Ha'mmenin' u'stinen qarar.
14 Jarlılardı jer betinen, Mu'ta'jlerdi adamlar arasınan jalmap jutatug'ın, Tisleri qılısh, azıwları pıshaqtay adamlar bar.
15 Su'liktin' eki qızı bar. „Ber, ber“, – dep baqırar olar. Hesh qashan toymaytug'ın u'sh na'rse, „Jeterli“ demeytug'ın to'rt na'rse bar.
16 O'liler ma'kanı, na'silsiz qursaq, Suwg'a qanbaytug'ın topıraq penen o'rt hesh qashan „jeterli“ demes.
17 A'keni mazaqlaytug'ın, anag'a boysınıwdan bas tartatug'ın ko'zdi, Oypatlıqtag'ı g'arg'alar shoqıydı, qara qustın' palapanları jeydi.
18 Menin' aqılım jetpeytug'ın u'sh na'rse, Men tu'sinbeytug'ın to'rt na'rse bar:
19 Aspandag'ı bu'rkittin' jolı, Tas u'stindegi jılannın' jolı, Ten'iz ortasındag'ı kemenin' jolı, Erkektin' qızg'a baratug'ın jolı.
20 Buzıq hayaldın' jolı da sonday. Ol jep bolıp, awzın su'rtip, „Hesh jamanlıq islemedim“, – der.
21 Jer u'sh na'rseden la'rzege keler, To'rtewin ol ko'tere almas:
22 Qul patsha bolg'anda, Aqmaq asqa toyg'anda,
23 Jag'ımsız qız turmısqa shıqqanda, Shorı xanımının' ornın alg'anda.
24 Jer betinde to'rt kishkene na'rse bar, Biraq olar danalardın' danası:
25 Qumırısqa ku'shsiz janzat, Biraq qıs azıg'ın jazda tayarlar.
26 Daman ha'lsiz janzat, Biraq o'z inin jartasqa salar.
27 Shegirtkede patsha joq, Biraq ha'mmesi sap tartıp ju'ris qılar.
28 Kesirtkeni qol menen uslawg'a bolar, Biraq ol patsha sarayında da bola alar.
29 Qa'demi sawlatlı u'sh na'rse, Ju'risi aybatlı to'rt na'rse bar:
30 Haywanlardın' en' ku'shlisi arıslan, Hesh na'rseden qaymıqpas.
31 Ma'kiyenler aldındag'ı qoraz, Su'riw aldındag'ı teke, Ordasının' basındag'ı patsha.
32 Eger menmenlik etip aqmaqlıq qılg'an, Yamasa jamanlıq oylag'an bolsan', Awzın'dı qolın' menen jap.
33 Su'tti gu'bige pisse may shıg'ar, Murıng'a ursa qan shıg'ar, Sol sıyaqlı, ashıwdı qozg'asa ja'njel shıg'ar».
