1 Hesh kim quwmasa da, qılmısker qasha berer, A'diller arıslanday batır bolar.
2 Elde nızamsızlıq ko'beyse, basshılar ko'beyer, Tu'simpaz ha'm bilimli basshı bolsa, elde ta'rtip saqlanar.
3 Ha'lsizlerdi ezetug'ın jarlı, Egindi jaypaytug'ın no'ser jawıng'a uqsar.
4 Nızamdı buzg'anlar zalımlardı maqtar, Nızamg'a a'mel qılg'anlar olarg'a qarsı turar.
5 Jawız adamlar a'dalattı uqpas, Jaratqan İyeni izlegenler ha'mmesin tu'siner.
6 Natuwrı joldan ju'rgen baydan, Minsiz ju'rgen jarlı jaqsı.
7 Nızamdı ustang'an – aqıllı bala, Jaramasqa dos bolg'an a'kesin uyatqa qoyar.
8 U'steme paydası menen baylıq jıynag'an, Onı jarlılarg'a saqawat ko'rsetken adam ushın jıynaydı.
9 Nızamdı esitpew ushın qulag'ın jawg'an adamnın', Etken duwası da jerkenishli.
10 Haq adamdı joldan azg'ırg'an, O'zi qazg'an shuqırg'a o'zi tu'ser, Minsizler jaqsılıqtı miyras qılar.
11 Bay adam o'zin dana sanar, Aqıllı jarlı onı a'shkara qılar.
12 A'diller u'stin shıqsa, quwanısh hu'kim su'rer, Zalımlar lawazımg'a ko'terilse, jurt bas sawg'alar.
13 Qılmısın jasırg'an tabısqa erispes, Moyınlag'an ha'm olardan bas tartqan rehim tabar.
14 Ba'rqulla Qudaydan qorqqan adam qanday baxıtlı! Ju'regin qatal qılg'an apatqa ushırar.
15 Jarlı xalıqqa biylik etken zalım basshı, Aqırg'an arıslang'a yaki ash ayıwg'a uqsar.
16 Aqılsız hu'kimdar xalqın ezer, Haram paydanı jek ko'rgennin' o'miri uzaq bolar.
17 Qan to'gip adam o'ltirgen, Go'rge kirgenshe, qashıp ju'rer, Og'an hesh kim ja'rdem bermesin!
18 Minsiz ju'rgen qa'wipsizlikte bolar, Nadurıs joldan ju'rgen tosattan qular.
19 Jerine ta'rbiya bergennin' tamag'ı toq bolar, Bos arzıw-qıyalg'a berilgen joqshılıqqa toyar.
20 Sadıq adam jarılqawg'a bay bolar, Bayıwg'a asıqqan jazasız qalmas.
21 Adamlardı alalaw jaqsı emes, Geybir adam bir tislem nan ushın nahaqlıq qılar.
22 İshi tar adam bayıwg'a asıg'ar, Joqshılıqqa ushıraytug'ının oylamaydı da.
23 Adamdı a'dil a'shkaralag'an, Aqırında, jag'ımpazg'a qarag'anda u'lken hu'rmetke eriser.
24 «Gu'na emes», – dep ata-anasınan urlaytug'ın – Gellekeserlerdin' sherigi.
25 Ashko'z ja'njel shıg'arar, Jaratqan İyege u'mit artqan toq jasar.
26 O'zine isengen – aqılsız, Danalıq penen ju'rgen qa'wipsizlikte bolar.
27 Jarlıg'a bergen kem bolmas, Onnan ko'z jumg'an ko'p g'arg'ısqa qalar+\.
28 Zalımlar lawazımg'a ko'terilse, jurt bas sawg'alar, Olar qulasa, a'diller ko'beyer.
