Hikmetleri 25 bob
1 Mınalar da Yahuda patshası Xizkiyanın' adamları ta'repinen jazıp alıng'an Sulaymannın' hikmetleri:
2 İsti qupıya etiw – Qudaydın' dan'qı, İsti izertlep ashıw – patshalardın' dan'qı.
3 Aspannın' biyikligi, jerdin' teren'ligi kibi, Patshanın' oy-niyeti de tu'sinip bolmas na'rse.
4 Gu'misten g'awajaqtı alıp tasla, Sonda o'nerment onnan ıdıs sog'a alar.
5 Patshadan zalımdı uzaqlastır, Onın' taxtı a'dillik penen bekkem bolar.
6 Patshanın' aldında ga'rdiyme, Ullılardın' ornına turıp alma.
7 Hasılzada aldında kemsitilgennen go're, Onın' sag'an: «Bılay, joqarı shıq», – degeni jaqsıraq.Ko'zlerin' menen ko'rgen na'rseni,
8 Hu'kimge tapsırıwg'a asıqpa. Eger qarsılasın' seni jen'ip shıg'ıp, uyaltsa, Keyin ne qılasan'?
9 Dawdı jaqının' menen jeke talqıla, Basqanın' sırın ashpa.
10 Bolmasa, adamlar esitip, seni uyaltar, Jaman atın' izin'nen qalmas.
11 Ornı menen aytılg'an so'z, Gu'mis tabaqqa salıng'an altın almag'a uqsar.
12 Tın'lar qulaqqa dananın' a'shkaralawı, Altın sırg'ag'a yaki sap altın tag'ınshaqqa uqsar.
13 Sadıq elshi o'zin jibergenler ushın, Orım-jıyın waqtındag'ı qardın' suwıg'ı yan'lı, O'z xojayınlarının' janın jay taptırar.
14 Berilmegen sıydı aytıp maqtanatug'ın adam, Qurg'aq samal ha'm jawmas bultqa uqsaydı.
15 Sabırlılıq penen hu'kimdar ko'ndiriler, Jumsaq til su'yekti sındırar.
16 Pal tapsan', jeterlisin je, Artıq jesen', qusıp taslarsan'.
17 Qon'sın'a jiyi-jiyi bara berme, Sennen bezip, jek ko'rip qalmasın.
18 Jaqınına qarsı jalg'an gu'walıq bergen adam, Shoqmar, qılısh ha'm ushlı oqqa uqsar.
19 Apat ku'ni opasızg'a u'mit artıw, Sıng'an tis ha'm sal bolg'an ayaqqa megzer.
20 Qayg'ılıg'a kewilli qosıq aytıw, Suwıq ku'ni kiyimin sheship alg'ang'a, Yamasa jarag'a duz sepkenge megzer.
21 Eger dushpanın' ash bolsa, og'an nan ber, Eger sho'llese, suw ber.
22 Solay islep, onı uyaltarsan', Esesin Jaratqan İyeden alarsan'.
23 Arqa samalı jawın alıp keler, O'sekshi til adam ju'zinde g'a'zep oyatar.
24 Urısqaq hayal menen bir u'yde jasag'annan, U'shektin' bir mu'yeshinde jasag'an jaqsı.
25 Alıs elden kelgen jaqsı xabar, Sho'llegenge berilgen suwıq suwg'a megzer+.
26 Zalımg'a bas iygen a'dil adam, Ilaylang'an bulaq ha'm pataslang'an qudıqqa megzer.
27 Ko'p pal jegen jaqsı emes, Dan'q ushın umtıla beriw de dan'q a'permes.
28 O'zin basqara almaytug'ın adam, Diywalsız, wayran bolg'an qalag'a megzer.
