Hikmetleri 23 bob
1 Hu'kimdar menen dasturxanlas bolg'anın'da, Aldın'dag'ılarg'a dıqqat penen na'zer sal,
2 Eger qulqının'dı tıya almasan', Awzın'dı buwıp qoy.
3 Onın' da'mli tag'amların kewlin' ku'semesin, Ol hiyle menen berilgen bolıwı mu'mkin.
4 Bay bolıw ushın o'zin'di zorıqtırma, Bul oyın'dı shıg'arıp taslaytug'ın danalıqqa iye bol.
5 Baylıq ko'z ashıp jumg'ansha joq bolar, Qanat baylap, bu'rkit kibi aspang'a ushıp keter.
6 İshi tardın' u'yinen as ishpe, Onın' mazalı tag'amların da ku'seme.
7 Ol jegen ha'r bir na'rsen'di esaplap turar, «İsh, je», – der sag'an, biraq ju'regi bunı qa'lemes.
8 Jegen az-maz na'rsen'di qusıp taslarsan', Aytqan jaqsı so'zlerin' de bosqa keter.
9 Aqmaqqa so'z aytpa, Ol senin' dana so'zlerin'di mensinbeydi.
10 Eski shegara belgisin jıljıtpa, Jetimnin' atızına qol salma.
11 Olardın' A'mengeri ku'shli, Ol sag'an qarsı shıg'ıp, olardın' isin jaqlar.
12 Ju'regin'di ta'limge, Qulag'ın'dı bilimli so'zlerge ber.
13 Balanı ta'rbiyasız qaldırma, Onı qamshı menen jazalasan' da, o'lmeydi.
14 Onı qamshı menen jazala, Janın o'liler ma'kanınan qutqararsan'.
15 Balam, eger ju'regin' dana bolsa, Menin' ju'regim de shadlanar.
16 Awzın' durıs so'ylese, Qa'lbim shadlanar.
17 Ju'regin' gu'nakarlarg'a ha'wes qılmasın, Ba'rqulla Jaratqan İyeden qorqıp jasa.
18 Sonda keleshegin' bolatug'ını gu'mansız, U'mitin' de bosqa shıqpas.
19 Tın'la balam, dana bol, Ju'regin'di tuwrı jolg'a bag'ıtla.
20 Ma'sku'nem ha'm go'shke toymaytug'ınlar arasında bolma.
21 Ma'sku'nem ha'm ashko'z adam jarlılanar, Uyqıshılıq adamg'a jırtıq kiyim kiygizer.
22 Seni du'nyag'a keltirgen a'ken'e qulaq sal, Qartayg'anında anan'dı mensinbey ju'rme.
23 Haqıyqattı satıp al, onı satpa, Danalıq, ta'lim ha'm aqılg'a iye bol.
24 A'dildin' a'kesi shadlanadı, Dana balası bar a'ke ol ushın quwanadı.
25 A'ken' ha'm anan' quwansın, Seni tuwg'an qattı shadlansın!
26 Balam, ju'regin'di mag'an bag'ıshla, Ko'zlerin' men ju'rgen jolda bolsın.
27 Buzıq hayal – teren' shuqır, O'zgenin' hayalı – tar qudıq.
28 Ol qaraqshıday buqqıda ku'ter, Biyopa erkektin' sanın ko'beyter.
29 Ah shekken kim? Dad salg'an kim? Kimde ja'njel? Kimde shag'ım? Kimge sebepsiz ko'k tu'sken? Kimnin' ko'zleri qızarg'an?
30 Bunın' ba'ri sharap iship ko'p otıratug'ınlarda, Aralas sharaplardı tatıp ko'riwge barg'anlarda bolar.
31 Sharaptın' qızarg'anına, Kesede tawlanıp turıwına, Jumsaq jutılıwına qarama!
32 Aqıbetinde ol jılan kibi shag'ar, Sur jılan kibi uwın shashar.
33 Ko'zlerin'e ersi na'rseler ko'riner, Oyın'nan jaman pikirler o'ter.
34 Sen ten'izdin' qaq ortasında qayıqta, O'rlik ag'ashının' u'stinde jatırg'anday bolarsan'.
35 «Meni urdı, awırmadı, Sabadı, mag'an sezilmedi, Ja'ne ishimlikti izlew ushın, Qashan oyanaman?» – dersen'.
