1 Dasturxanı mol ha'm zıyapatı ko'p ja'njelli u'yden, Bir tislem qattı nanı ba tınısh-tatıw u'y jaqsıraq.
2 Uyat is qılatug'ın uldı aqıllı qul basqarar, Ol tuwısqanlar qatarında miyrasqa sherik bolar.
3 Gu'mis balqıtıwxanada, altın oshaqta sınalar, Adamnın' ju'regin Jaratqan İye sınar.
4 Zalım jawızdın' so'zine dıqqat qoyar, O'tirikshi bu'lginshi tilge qulaq salar.
5 Ka'mbag'aldı mazaq qılg'an Jaratqandı xorlag'an bolar, Baxıtsızlıqqa quwang'an jazasız qalmas.
6 Aqlıqlar – qariyalar tajı, Ata-analar – balalar maqtanıshı.
7 To'reli so'z aqmaqqa jaraspag'anı sıyaqlı, O'tirik so'z de hu'kimdarg'a jaraspas.
8 Beriwshinin' na'zerinde para sıyqırlı tasqa uqsar, Ne qılsa da isi tabıslı bolar.
9 Qa'teni keshirgen doslıqtı saqlar, Onı qayta-qayta esley bergen dostın bezdirer.
10 Aqılsızg'a berilgen ju'z du'rreden go're, Aqıllıg'a berilgen bir keyis ta'sirlirek.
11 Jaman adam tek bu'lginshilikti go'zler, Sonlıqtan og'an qarsı zalım perishte jiberiler.
12 Aqmaqtın' aqmaqlıg'ına tap bolg'ansha, Balasınan ayırılg'an ana ayıwg'a tap bolg'an jaqsıraq.
13 Jaqsılıqqa jamanlıq qılg'annın', U'yinen jamanlıq arımas.
14 Ja'njeldin' baslanıwı jıqqın suwg'a uqsar, Ja'njeldi ku'sheymesten burın toqtat.
15 Nahaqtı aqlaw ha'm haqtı ayıplaw – Ekewi de Jaratqan İyege jerkenishli.
16 Aqılsızdın' qolındag'ı g'a'ziyneden ne payda? Danalıqtı iyelewge onın' qa'lewi joq g'oy!
17 Dos ha'rdayım su'yedi, Tuwısqan da qayg'ını bo'lisiw ushın tuwılg'an.
18 Aqılı kem qol berip, Qon'sısı ushın kepil bolar.
19 Gu'nanı jaqsı ko'rgen ja'njeldi su'yer, Da'rwazasın biyik qurg'an qulawdı izler.
20 Hiyleker ju'rek jaqsılıq tappas, O'tirikshi til ba'lege jolıg'ar.
21 Aqılsız bala tuwg'an adamnın' man'layının' sorı, Aqmaqtın' a'kesi quwanıshtın' ne ekenin bilmes.
22 Quwanıshlı ju'rek shıpa bag'ıshlawshı da'ri, Ezilgen ruwx su'yekti quwratar.
23 A'dalat jolın burmalaw ushın, Zalım jasırın para alar.
24 Aqıllı adam na'zerin danalıqtan qashırmas, Aqmaqtın' ko'zi jer tu'bin sharlar.
25 Aqmaq bala a'kesi ushın qayg'ı, Anası ushın g'am keltirer.
26 Ayıpsızdı jazalaw, Hasılzadanı hadallıg'ı ushın urıw jaqsı emes.
27 Bilimli adam tilin jılawlar, Parasatlı adam suwıqqan bolar.
28 Aqmaq ta u'ndemese dana sanalar, Awzına iyelik qılsa, parasatlı bolıp ko'riner.
