1 Adam joba du'zer, Biraq bul jobanın' juwabın Jaratqan İye berer.
2 Adamg'a ha'mme jolları hadal bolıp ko'riner, Biraq oy-niyetti Jaratqan İye o'lsher.
3 İslerin'di Jaratqan İyege tapsır, Sonda niyetin' ju'zege asar.
4 Jaratqan İye ha'mme na'rseni olardın' o'zlerinin' maqsetine say jarattı, Ha'tte, zalımlardı da apatshılıq ku'ni ushın jarattı.
5 Ha'r bir ta'kabbir Jaratqan İye ushın jerkenishli, Gu'mansız, olar jazasız qalmaydı.
6 Su'yispenshilik ha'm sadıqlıq gu'nanı juwar, Jaratqan İyeden qorqıw jawızlıqtan awlaq qılar.
7 Adamnın' jolı Jaratqan İyege maqul bolsa, Ol onı dushpanları menen de jarastırar.
8 Haram jol menen kirgen mol paydadan go're, Hadal jol menen kirgen azg'antay payda jaqsıraq.
9 Ju'rer jolın adam ju'reginde oylap qoyar, Biraq Jaratqan İye onın' adımların bag'darlar.
10 Patsha Qudaydın' atınan so'yleydi, Ol hu'kim qılg'anda a'dillikti burmalamawı tiyis.
11 Tuwrı ta'rezi ha'm ta'rezinin' pa'lleleri Jaratqan İyeden beriler, Barlıq ta'rezi tasları Ol arqalı jaratılg'an.
12 Patsha jawızlıqtan jerkener, Taxt a'dillik arqalı bekkem bolar.
13 A'dil til patshag'a unar, Haqıyqattı aytqandı ol su'yer.
14 Patshanın' g'a'zebi – o'lim xabarshısı, Biraq dana adam onı tınıshlandırar.
15 Patshanın' ju'zi nurlansa – o'mirden nıshan, Onın' miyrimi ba'ha'rdegi jawın alıp keletug'ın bultqa megzer.
16 Danalıqqa iye bolıw altınnan qanshelli jaqsıraq, Aqılg'a iye bolıw gu'misten qanshelli qunlıraq.
17 Haq adamnın' jolı jawızlıqtan awlaq qılar, Jolın qorg'ag'an o'z janın aman saqlar.
18 Wayran bolıwdan aldın menmenlik, Qulawdan aldın ta'kabbirlik keler.
19 Menmenler menen olja bo'liskennen, Jarlılar arasında kishipeyil bolg'an jaqsıraq.
20 Aqıl menen is alıp barg'an jaqsılıq tabar, Jaratqan İyeden u'mit etken baxıtlı bolar!
21 Ju'regi danalar parasatlı deliner, Jag'ımlı til ta'lim ku'shin arttırar.
22 Aqıl iyesi ushın – o'mir bulag'ı, Aqmaqlıq aqmaq ushın – jaza.
23 Dananın' ju'regi onın' so'zin dana qılıp, Awzındag'ı ta'limin arttırar.
24 Jag'ımlı so'z palday tatlı, Jang'a jag'ımlı, denege shıpalı.
25 Sonday jol bar, adamg'a durıs bolıp ko'riner, Biraq aqıbeti, o'limge alıp barar.
26 Adamnın' ishteyi og'an miynet ettirer, Ashlıg'ı onı ma'jbu'r eter.
27 On'bag'an adam jamanlıq oylar, Onın' so'zi jalmaytug'ın jalıng'a megzer.
28 Hiyleker adam ja'njel tuwdırar, O'sekshi doslardı ayırar.
29 Zorlıq islewshi jaqının azg'ırar, Onı jaman jolg'a baslar.
30 Ko'zin su'zip qarag'an hiyle oylar, Ernin tislegen jawızlıq isler.
31 Ag'arg'an shash – hu'rmetli taj, Tuwrı jasag'an onı qazanar.
32 Sabırlı adam ma'rt a'skerden, O'zin uslay alatug'ın adam qalanı basıp alg'annan u'stinirek.
33 Kiyimnin' shalg'ayına shek taslanar, Onın' sheshimi Jaratqan İyeden beriler.
