1 Mu'la'yim juwap ashıwdı basar, Ashshı so'z g'a'zepti qozg'ar.
2 Dananın' tili bilimdi maqtar, Aqılsızdın' awzınan aqmaqlıq ag'ar.
3 Jaratqan İyenin' ko'zi ha'mme jerde, Ol jamandı da, jaqsını da ko'rip turar.
4 Mu'la'yim til – o'mir teregi, O'tirikshi til – jandı jaralar.
5 Aqmaq a'kesinin' ta'rbiyasınan bezer, Eskertiwge qulaq asqan aqıl-parasatlı.
6 A'dildin' u'yinde mol g'a'ziyne bolar, Zalımnın' tapqanı mashqala alıp keler.
7 Dananın' awzı bilim taratar, Aqmaqtın' ju'regi onday emes.
8 Nahaqtın' qurbanlıg'ınan Jaratqan İye jerkener, Haq adamnın' duwası Og'an unar.
9 Zalımnın' jolınan Jaratqan İye jerkener, A'dillik izinen ju'rgendi Ol su'yer.
10 Tuwrı joldan adasqanlar awır jaza alar, Eskertiwdi jek ko'rgenler nabıt bolar.
11 O'liler ma'kanı ha'm nabıt bolıw ma'kanı Jaratqan İyege ayan eken, Demek, adam balasının' ju'regi Og'an olardan da ayanıraq!
12 Surbet o'zin a'shkaralag'andı unatpas, Ol dananın' qasına da jolamas.
13 Ju'rektin' quwanıshı ju'zdi jarqıratar, Ju'rektin' qayg'ısı ruwxtı so'ndirer.
14 Aqıllının' ju'regi bilimdi izler, Aqılsızdın' awzı aqmaqlıqqa toyınar+.
15 Baxıtsızdın' ha'r bir ku'ni qayg'ıdan arılmas, Ju'regi quwanıshlının' zıyapatı ada bolmas.
16 Ko'p baylıq penen ta'shiwishte jasag'annan go're, Az baylıq penen Jaratqan İyeden qorqıp jasag'an abzalıraq.
17 Jek ko'rip berilgen semiz baspaq go'shinen go're, Su'yispenshilik penen berilgen bılamıq jaqsıraq.
18 Ashıwshaq ja'njel tuwdırar, Sabır-taqatlı dawdı basar.
19 Erinshektin' jolı shatlı tikenge uqsar, Haq adamnın' jolı tegis bolar.
20 Dana bala a'kesin quwantar, Aqmaq bala anasın pisent etpes.
21 Aqmaqlıq aqılsızdı quwandırar, Aqıllı adam tuwrı joldan ju'rer.
22 Ken'espey islengen is bosqa shıg'ar, Ko'p ma'sla'ha'tshinin' oy-niyeti iske asar.
23 Orınlı juwap adamdı quwantar, O'z waqtında aytılg'an so'z a'jayıp bolar!
24 To'mendegi o'liler ma'kanına tu'spewi ushın, Aqıllını o'mir jolı joqarıg'a jeteler.
25 Jaratqan İye ta'kabbirdin' u'yin qulatar, Jesirdin' jer shegarasın saqlap qalar.
26 Zalımlardın' niyetleri Jaratqan İyege jerkenishli, Jaqsı so'zler – pa'k.
27 Ashko'z o'z u'yine apat keltirer, Paranı jek ko'rgen tınısh o'mir su'rer.
28 A'dil oylap juwap berer, Zalımnın' awzı jawızlıq qusar.
29 Jaratqan İye zalımlardan alıs bolar, A'dillerdin' duwasın esiter.
30 Nurlı ju'z ju'rekti quwantar, Jaqsı xabar su'yekke azıq berer.
31 O'mir beretug'ın na'siyatqa qulaq salg'an, Danalar arasınan orın tabar.
32 Na'siyattan ju'z burg'an o'z janın xor qılar, Eskertiwge qulaq salg'an aqılg'a iye bolar.
33 Jaratqan İyeden qorqıw danalıqqa u'yreter, Kishipeyillik dan'qqa baslar.
