1 Aqıllı perzent a'kesinin' na'siyatına qulaq salar, Surbet perzent keyigenge qulaq aspas.
2 Jaqsı adam awzının' miywesinen jaqsılıq tatar, Opasızlar jawızlıqqa talpınar.
3 Tilin tıyg'an o'z o'mirin saqlap qalar, Tiline erk bergen o'zin nabıt qılar,
4 Erinshek qa'lese de, hesh na'rse ala almas, Talapshan'nın' tilegi aqırına deyin orınlanar.
5 A'dil adam o'tirik so'zdi jek ko'rer, Zalım uyatsızlıq qılıp, o'zinin' abırayın to'ger.
6 A'dillik minsizdi jolında qorg'ar, Zalımlıq gu'nakardı qulatar.
7 Birew hesh na'rsesi bolmasa da, o'zin bay qılıp ko'rseter, Basqası baylıg'ı mol bolsa da, o'zin jarlı qılıp ko'rseter.
8 Baylıg'ı menen adam o'z janın satıp alar, Jarlı bolsa qa'wip-qa'terden awlaq bolar.
9 A'dillerdin' nurı jarqırap jaynap turar, Zalımlardın' shırası da o'ship qalar.
10 Menmenlik daw-ja'njel keltirip shıg'arar, Ken'eske qulaq salg'anlarda danalıq bolar.
11 An'sat tabılg'an baylıq tez tawısılar, Miynet penen jıynag'an baylıg'ın ko'beyter.
12 Uzaq waqıt orınlanbag'an u'mit ju'rekti tu'n'ildirer, Orınlang'an tilek bolsa, o'mir teregine uqsar.
13 Na'siyattı mensinbegen o'zine zıyan keltirer, Buyrıqlardı hu'rmet etken sıy alar.
14 Danalar ta'limi – o'mir bulag'ı, Ol adamdı o'lim duzag'ınan awlaq qılar.
15 Jaqsı aqıl unamlı qılar, Opasızdın' o'miri wayran bolar.
16 Ha'r qanday aqıllı adam bilim menen is tutar, Aqılsız o'zinin' aqmaqlıg'ın ko'rseter.
17 Jaman shabarman apatqa ushırar, Sadıq elshi shıpa alıp keler.
18 Na'siyatqa qulaq salmag'an joqshılıq penen shermendelikke ushırar, Eskertiwdi qabıl etkenler hu'rmet-izzetke bo'lener.
19 Orınlang'an tilek jang'a jag'ımlı, Aqılsız jamanlıqtan waz keshiwdi jek ko'rer.
20 Dana menen dos bolg'an dana bolar, Aqılsız benen dos bolg'an apatqa ushırar.
21 Baxıtsızlıq gu'nakardı quwıp ju'rer, Abadanlıq a'dillerdin' sıyı bolar.
22 Jaqsı adam aqlıq-shawlıqlarına da miyras qaldırar, Gu'nakarlardın' baylıg'ı a'diller ushın jıynalar.
23 Jarlının' atızı da mol biyday beriwi mu'mkin, Biraq a'dalatsızlıq sebepli wayran bolar.
24 Jazalawg'a ayag'an balasın su'ymeydi, Balasın su'ygen balalıqtan ta'rbiyalaydı.
25 A'dil toyg'ansha jer, Zalımnın' qarnı ash ju'rer.
