1 Jaratqan İye jalg'an ta'reziden jerkener, Durıs ta'rezige Onın' kewli tolar
2 Menmenlik kelse, masqarashılıq ta keler, Kishipeyilliler danalıq penen birge bolar.
3 Haq niyetlinin' minsizligi og'an jol ko'rseter, Opasızdın' sumlıg'ı o'zinin' basına jeter.
4 G'a'zep ku'ni baylıq payda bermes, A'dillik o'limnen qutqarar.
5 Minsizdin' a'dilligi onın' jolın du'ziw qılar, Zalım zalımlıg'ı sebepli qulap tu'ser.
6 Haq niyetlini a'dilligi qutqarar, Opasızlar o'z na'psinin' torına tu'ser.
7 Zalım adam o'lgende, u'miti de u'ziler, Su'yengen baylıg'ı da paydasız bolar.
8 A'dil adam ba'leden qutılar, Onın' ornına zalım sol ba'lege duwshar bolar.
9 Qudaysız jaqının tili menen joq qılar, A'diller o'z bilimi menen aman qalar.
10 A'diller jaynap-jasnasa, qala quwanar, Zalımlar qulasa, quwanısh penen baqırısar.
11 Haq adamlardın' aq pa'tiyası menen qala rawajlanar, Zalımlardın' awzı menen ol wayran bolar.
12 Aqılsız jaqının kemsiter, Aqıllı awzına bek bolıp ju'rer.
13 O'sek tasıg'an sırdı ashar, Sadıq adam sırdı saqlar.
14 Qa'wendersiz el qular, Ken'esshisi ko'p el jen'er.
15 Basqag'a kepil bolg'an ba'lege jolıg'ar, Kepil bolıwdan qashqan qa'wipsizlikte bolar.
16 Miyrimli hayal abırayg'a eriser, Tas bawır erkek tek baylıqqa iye bolar.
17 Miyrimli adam o'z janına jaqsılıq qılar, Tas bawır o'zine zıyan keltirer.
18 Zalım aldamshı sıy ushın miynet eter, A'dillik sebiwshi haqıyqıy sıy alar.
19 A'dillikti ustang'an jasar, Jawızlıqqa umtılg'an o'ler.
20 Hiyleker ju'rekli Jaratqan İyege jerkenishli, Al minsiz ju'rgenge kewli tolar.
21 Bilip qoy, zalım jazasız qalmas, A'dildin' a'wladı aman qalar.
22 Sulıw, biraq a'depsiz hayal, Shoshqanın' murnına tag'ılg'an altın a'rebekke megzer.
23 A'dillerdin' tilegi tek jaqsılıq, Al zalımlardın' ku'tkeni – g'a'zep.
24 Birew ken' peyillik penen shashar, sonda da baylıg'ı arta berer, Birew ha'dden tıs saq, biraq jarlılana berer.
25 Saqıy bolg'an molshılıqqa eriser, Sho'llegenge suw bergennin' o'zine de suw beriler.
26 Biydaydı jasırg'andı xalıq na'letler, Onı satqang'a pa'tiya beriler.
27 Jaqsılıqqa talpıng'an bereket tabar, Jawızlıqtı izlegenge jawızlıq keler.
28 O'z baylıg'ına isengen qular, A'diller bolsa jasıl japıraqtay jaynap o'ser.
29 Xojalıg'ın azapqa qaldırg'an samaldı miyras etip alar, Aqılsız danag'a qul bolar.
30 A'dildin' miywesi – o'mir teregi, Dana adamlardı o'zine tartar.
31 Eger a'dil adamg'a jer betinde isine say qaytarılsa, Onda zalımlar menen gu'nakarlarg'a sira' da jaza beriler.
