Hikmetleri 10 bob
1 Sulaymannın' dana hikmetleri: Dana perzent a'kesinin' quwanıshı, Aqılsız perzent anasının' qayg'ısı.
2 Haram baylıq payda keltirmes, Al a'dillik o'limnen qutqarar.
3 Jaratqan İye a'dil adamdı ash qoymas, Zalımlardın' qa'lewinin' orınlanıwına jol qoymas.
4 Erinshek qol jarlı qılar, Miynetkesh qol baylıq keltirer.
5 Jazda o'nim jıynag'an – aqıllı bala, Jıyın-terim waqtında uyıqlag'an bala a'kesin uyatqa qaldırar.
6 A'dil adamnın' basına bereket jawar, Zalımnın' awzı zorlıqtı jasırar.
7 A'diller ırazılıq penen eske alınar, Zalımlardın' atı umıt bolıp keter.
8 Dananın' ju'regi buyrıqlardı qabıl eter, Aqmaqtın' tili apatqa jeteler.
9 Hadal ju'rgen qa'wipsiz ju'rer, Al o'z jolın nadurıs ta'repke burg'an a'shkara bolar.
10 Ko'z qısqan adam apatqa jolıg'ar, O'tirik so'ylegen nabıt bolar.
11 A'dildin' awzı – o'mir bulag'ı, Al zalımnın' awzı zorlıqtı jasırar.
12 O'shpenlilik ja'njel tuwdırar, Su'yispenshilik barlıq qılmıslardı juwıp keter.
13 Aqıllı adamnın' awzınan danalıq to'giler, Es-aqılı kem adamnın' arqasına qamshı tiyer.
14 Danalar bilimdi saqlap qoyar, Aqılsızdın' awzı ba'leni jaqınlastırar.
15 Baydın' baylıg'ı – onın' qorg'anı, Jarlının' apatı – onın' ka'mbag'allıg'ı.
16 A'dildin' miyneti o'mirge, Zalımnın' tabısı gu'nag'a aparar.
17 Na'siyattı alg'anlar o'mir jolında ju'rer, A'shkaralag'andı ta'n almag'anlar joldan azg'ırılar.
18 Qaslıg'ın jasırg'annın' tili jalg'anshı, O'sek taratqan adam aqılsız.
19 Ko'p so'ylegen qılmıssız bolmas, Tilin tıyg'an – aqıllı.
20 A'dildin' tili – saylandı gu'mis, Zalımnın' ju'regi hesh na'rsege arzımas.
21 A'dildin' tili ko'plerdi azıqlandırar, Aqmaq aqılı jetpegenlikten nabıt bolar.
22 Jaratqan İyenin' jarılqawı adamdı bayıtar, Ol baylıqqa g'am-qayg'ını qospas.
23 Aqılsız jamanlıq qılıwdan, Tu'simpaz danalıqtan la'zzet alar.
24 Zalım neden qorqsa, sog'an tap bolar, A'dil adamlardın' a'rmanı orınlanar.
25 Quyın turıp, zalımlar joq bolar, A'diller ma'n'gi bekkem turar.
26 Erinshek o'zin jumsag'anlar ushın, Tiske quyılg'an sirke suwına, Ko'zge kirgen tu'tinge megzer.
27 Jaratqan İyeden qorqıw o'mirdi uzaytar, Al zalımlardın' o'miri qısqarar.
28 A'dildin' da'mesi shadlıqqa jeteler, Zalımnın' u'miti pushqa shıg'ar.
29 Jaratqan İye jolı minsizlerge qorg'an, Jawızlıq islewshilerge apatshılıq boladı.
30 A'dil adam ma'n'gige shayqalmas, Zalım adam jer betinde tura almas.
31 A'dildin' awzı danalıqtan so'yler, Al jalg'anshının' tili kesip taslanar.
32 A'dildin' tili mu'na'sip so'zlerdi biler, Zalımnın' awzı o'tirik so'zler shıg'arar.
