Hikmetleri 1 bob
1 Bular İzraildın' patshası Dawıttın' ulı Sulaymannın' hikmetleri:
2 Bul hikmetlerdin' maqseti mınaw: Danalıqtı ha'm na'siyattı u'yretiw, Aqıllı so'zlerdi tu'sindiriw;
3 Tuwrı jasaw qag'ıydaların, A'dillik, a'dalatlıq ha'm hadallıqtı o'zlestiriw;
4 Sadalarg'a teren' tu'sinik, O'spirimlerge bilim ha'm sana beriw.
5 Danalar tın'lap, bilimine bilim qosadı, Aqıllılar dana ken'es aladı.
6 Usılayınsha olar naqıl ha'm hikmetlerdi, Danıshpanlardın' so'zleri menen jumbaqların tu'sinedi.
7 Jaratqan İyeden qorqıw – danalıqtın' bası. Tek aqılsızlar g'ana danalıq ha'm na'siyattı jek ko'redi.
8 Balam, a'ken'nin' na'siyatlarına qulaq sal, Anan' bergen ta'limnen bas tartpa!
9 Olar basın'a a'jayıp taj, Moynın'a monshaq boladı.
10 Balam! Eger gu'nakarlar seni azg'ırmaqshı bolsa, Olarg'a ko'nbe.
11 Eger olar: «Bizler menen ju'r, Qan to'giw ushın buqqıda jatayıq, Sebepsizden sebepsiz biygu'nanı an'lıyıq.
12 Olardı o'liler ma'kanı kibi tiriley, Tun'g'ıyıqqa tu'skenler kibi pu'tinley jutayıq.
13 Barlıq qımbatbaha zatların alayıq, U'ylerimizdi oljag'a toltırayıq.
14 Bizler menen ta'wekelge bel bayla, Bar baylıg'ımız ortaq boladı», – dese,
15 Balam, olar menen joldas bolma, Olardın' jolınan awlaq bol!
16 Olardın' ayaqları jawızlıqqa talpınar, Qan to'giwge asıg'ar.
17 Ha'tte, quslar da, Ko'z aldında qurılg'an awg'a tu'spes.
18 Al sol adamlar o'z qanın to'giw ushın buqqıda jatadı, O'zlerinin' janın o'zleri an'lıydı.
19 Haram tabısqa qumardın' aqıbeti sonday boladı, Sol qumarlıq haram tabıs iyesinin' basın jalmaydı.
20 Danalıq ko'shelerde jar salıp, Maydanlarda dawıslap baqıradı.
21 Shawqımlı ko'shenin' basında qıshqırıp, Qala da'rwazalarının' kirer awzında o'z so'zin aytadı:
22 «Ha'y, sadalar! Sadalıg'ın'ızdı qashang'a deyin su'ymekshisiz?Surbetler qashang'a deyin mazaqlawdan zawıq aladı? Aqmaqlar qashang'a shekem bilimdi jek ko'redi?
23 Qa'ne, menin' a'shkaralag'anımnan du'zelsen'iz edi! Sizlerdi ruwxıma toltırıp, So'zlerimdi bildirer edim.
24 Sizlerdi shaqırdım, meni tın'lawdan bas tarttın'ız, Qolımdı sozdım, na'zer awdarg'an bolmadı.
25 Sizler menin' barlıq ken'eslerimdi mensinbedin'iz, Menin' a'shkaralawlarımdı qabıl etpedin'iz.
26 Sonın' ushın men de apatqa ushırag'anın'ızda, u'stin'izden ku'lemen, Hu'reyin'iz ushqanda, mazaq qılaman+.
27 Qorqınısh dawılday bastırıp kelgende, Apatshılıq quyınday du'begende, Qayg'ı ha'm ha'siret basın'ızg'a tu'skende,
28 Meni shaqırasız, men de juwap bermeymen, Meni izleysiz, biraq tappaysız.
29 O'ytkeni sizler bilimdi jek ko'rdin'iz, Jaratqan İyeden qorqıwdı maqul ko'rmedin'iz.
30 Ken'eslerimdi qabıl qılmadın'ız, A'shkaralawlarımdı ko'zge ilmedin'iz.
31 Sonın' ushın, tutqan jolın'ızdın' ashshı miywelerin jep, O'z sumlıqların'ızg'a toyınasızlar.
32 Sadanın' o'jetligi o'zin o'ltiredi, Aqmaqtın' biyg'amlıg'ı onı qurtadı.
33 Al meni tın'lag'anlar qa'wipsiz jasap, Jamanlıqtan qorqpay, tınısh boladı».
