Shıg'ıw 5 bob
1 Son'ınan Muwsa menen Xaron faraong'a barıp, og'an: – İzraildın' Qudayı Jaratqan İye bılay deydi: «Sho'lge barıp, Mag'an arnap bayram qılıwı ushın, xalqımdı jiber», – dedi.
2 Biraq faraon olarg'a: – Men aytqanın tın'lap, İzrail xalqın jiberetug'ınday, Jaratqan İye kim bolıptı? Men Jaratqan İyeni tanımayman, izraillılardın' ketiwine de ruxsat bermeymen, – dedi.
3 Sonda Muwsa menen Xaron: – Evreylerdin' Qudayı bizler menen ushırastı. U'sh ku'nlik jol ju'rip, sho'lde Qudayımız Jaratqan İyege qurbanlıq berip qaytıwg'a ruxsat etsen'iz. Bolmasa, Ol bizlerdi illet penen yamasa qılısh penen jazalaydı, – dedi.
4 Al Mısır patshası olarg'a: – Ha'y, Muwsa ha'm Xaron! Nege xalıqtı jumısınan alag'ada qılıp atırsız? Barın', jumısın'ızg'a qaytın'.
5 Sonshelli ko'p puqaralardı ne ushın jumısınan qaldırajaqsız? – dedi.
6 Sol ku'ni faraon qul jumsawshılarına ha'm izraillı baqlawshılarg'a buyrıq berip bılay dedi:
7 – Bunnan bılay, gerbish islew ushın xalıqqa burıng'ıday saban bermen'. Barıp, sabandı o'zleri jıynap alsın.
8 Biraq burın qansha gerbish quyg'an bolsa, endigiden bılay da, sonsha gerbish quyıwdı talap etin'. Gerbish sanın azaytpan'. O'ytkeni olar erinshek adamlar bolg'anlıqtan: «Barıp, Qudayımızg'a qurbanlıq beremiz», – dep baqırmaqta.
9 Jumısların sonshelli da'rejede awırlastırın', olar is penen ba'nt bolıp, jalg'an so'zlerge qulaq aspasın.
10 Solay etip, qul jumsawshılar ha'm izraillı baqlawshılar barıp, izraillılarg'a bılay dedi: – Faraon bılay demekte: «Endi sizlerge saban bermeymen.
11 Sabandı qay jerden tapsan'ız, sol jerden tabın'lar. Biraq quyatug'ın gerbishin'izdin' mug'darı azaytılmaydı».
12 Solay etip, xalıq atızlardan saban jıynaw ushın pu'tkil Mısır boylap tarap ketti.
13 Qul jumsawshılar olardı qısqıg'a alıp: «Ku'ndelik jumısın'ızdı saban berilgen ku'nlerdegidey tolıq orınlan'», – dedi.
14 Son'ınan olar: «Nege sizler keshe ha'm bu'gin burıng'ıday mug'darda gerbish quydırmadın'ız?» – dep o'zleri qoyg'an izraillı baqlawshılardı urdı.
15 Sonlıqtan izraillı baqlawshılar faraong'a barıp, og'an bılay dep nala shekti: – Nege qulların'ızg'a bunday qatnas jasap atırsız?
16 Bizlerge saban bermese de, gerbish quyıwdı talap etedi. Minekey, qulların'ız bolg'an bizler tayaq jep atırmız. Al bug'an ayıplı – sizin' adamların'ız.
17 Biraq faraon olarg'a: – Sizler erinsheksizler, erinshek! Sol sebepten: «Barıp, Jaratqan İyege qurbanlıq beremiz», – dep atırsızlar.
18 Qa'nekey, barın'lar jumısların'ızg'a! Sizlerge saban berilmeydi. Al gerbishti belgilengen mug'darda jetkizesizler, – dedi.
19 «Ku'ndelikli jetkiziletug'ın gerbishtin' mug'darın azaytpaysızlar», – degen so'zlerdi esitkende, izraillı baqlawshılar o'zlerinin' qıyın awhalda ekenin tu'sindi.
20 Olar faraonnın' aldınan shıqqannan keyin, o'zlerin ku'tip turg'an Muwsa menen Xarong'a duslasıp,
21 olarg'a: – Sizler bizlerdi faraong'a ha'm onın' xızmetshilerine jaman atlı qıldın'ız. Bizlerdi o'ltiriw ushın, olardın' qollarına qılısh uslattın'ız. Bul isin'izdi ko'rip, Jaratqan İye sizlerdi jazalasın, – dedi.
22 onda Muwsa ol jerden ketti ha'm Jaratqan İyenin' aldına barıp, bılay dedi: – İyem! Ne ushın bul xalıqtı ba'lege duwshar qıldın'? Meni ne ushın jiberdin'?
23 Faraong'a barıp, Senin' atın' menen so'ylegen ku'nimnen beri, faraon bul xalıqtı ba'lege duwshar qılmaqta. Al Sen O'z xalqın'dı qutqarıw ushın hesh na'rse islemedin'.
