1 Atqarıwshılardın' jetekshisi Edutun ushın. Asaftın' jırı
2 Dawıslap Qudayg'a jalbarınaman, Dawıslap Qudaydı shaqıraman, Ol meni esitedi.
3 Qıyın ku'nimde İyeni izledim, Tu'ni menen qollarımdı tu'sirmey jaydım, Kewlim bas tarttı jubanıshtan.
4 Qudaydı eslesem, ah uraman, Oy juwırtsam, ruwxım ha'lsireydi.
5 Ko'zlerime uyqı bermeysen', Ha'wlirip ketkenlikten, so'yley almayman.
6 O'tmishtegi ku'nler haqqında, O'tken jıllar haqqında oylayman.
7 Tu'nde aytqan qosıqlarımdı eske alaman, O'zim menen o'zim so'ylesip, Ruwxım sorawlarg'a juwap izler:
8 İye bizlerden ma'n'gi bas tarttı ma? Endi qaytıp hesh qashan mag'an miyrimin' tu'spey me?
9 Onın' su'yispenshiligi ma'n'gi joq bolg'anı ma? Bergen so'zi a'wladtan-a'wladqa dawam etpey me?
10 Quday rehim etiwdi umıtqanı ma? Miyrim-sha'pa'a'tinin' ornın g'a'zep basqanı ma?
11 O'zime o'zim bılay dedim: «Mine, menin' da'rtim – Quday Taalanın' O'z ku'shin ko'rsetpewi».
12 Jaratqan İyenin', Senin' islerin'di eske alaman, Burıng'ı ka'ramatların'dı esleymen.
13 Senin' barlıq islerin'di tu'siniwge tırısaman, Ullı islerin' u'stinde oy juwırtaman.
14 Quday, jolın' muxaddesdur! Quday, Sen sıyaqlı basqa ullı quday bar ma?
15 Sen – ka'ramatlar isleytug'ın Qudaysan', Xalıqlar arasında O'z qu'diretin'di ko'rsettin'.
16 O'z ku'shin' menen xalqın'dı, Yaqıp ha'm Yusup a'wladların azat qıldın'.
17 Suwlar Seni ko'rip, Quday, Suwlar Seni ko'rip, qorqıp ketti. Tu'psiz ten'izler titiredi.
18 Bultlardan jawın quydı, Ko'klerden shaqmaq shaqtı, Sonda Senin' oqların' ushtı.
19 Du'beley ishinde dawısın' gu'rkiredi, Jıldırımlar jer ju'zin jarıq qıldı. Jer titirep, la'rzege keldi.
20 Jolın' ten'iz arqalı, Soqpag'ın' ullı suwlar arqalı o'tti, İzlerin' bolsa, ko'rinbedi.
21 Muwsa ha'm Xaronnın' qolları menen, Xalqın'dı su'riw sıyaqlı alıp ju'rdin'.
