Zabur 71 bob

Sulaymannın' jırı

¹ Quday, hu'kim shıg'arıwdı patshag'a, A'dalatlıg'ın'dı patshanın' ulına sıyla.

² Ol Senin' xalqın'dı a'dalatlıq penen, G'a'riplerin'di tuwrılıq penen hu'kim qılsın!

³ Tawlar xalıqqa abadanshılıq, To'beshikler haqıyqatlıq alıp kelsin.

⁴ Patsha jarlılardı qorg'asın, Ka'mbag'allardın' balaların qutqarsın, Zalımlardı ezip taslasın.

⁵ Quyash ha'm ay turg'anınday, Xalqın' a'wladtan-a'wladqa Sennen qorqıp jasasın.

⁶ Patshamız jan'a orılg'an atızg'a jawg'an jawınday, Topıraqtı suwg'aratug'ın bereketli jawınday bolsın.

⁷ Onın' da'wirinde haq adam gu'llep, jasnasın, Ay joq bolıp ketkenshe, abadanshılıq mol bolsın.

⁸ Ol hu'kimdarlıq etsin bir ten'izden ekinshi ten'izge deyin, Evfrat da'ryasınan jer ju'zinin' shetine deyin!

⁹ Onın' aldında sho'lde jasaytug'ınlar bas iysin, Dushpanları topıraq jalasın.

¹⁰ Tarshish ha'm ataw u'lkelerinin' patshaları, Og'an salıq alıp kelsin. Sheba ha'm Seba patshalıqları sawg'alar usınsın.

¹¹ Barlıq patshalar aldında ta'jim qılsın, Pu'tkil xalıqlar og'an xızmet etsin!

¹² Ol nala shekken jarlıg'a ja'rdem berer, Su'yenishi joq biysharanı qutqarar.

¹³ G'a'rip ha'm jarlıg'a rehimi keler, Jarlılardın' janın qutqarar.

¹⁴ Zorlıq ha'm zulımlıqtan olardı azat qılar, Olardın' qanı onın' na'zerinde a'zizdur.

¹⁵ Patshanın' o'miri uzaq bolsın! Shebanın' altını og'an berilsin, Tınımsız duwa etilsin ol ushın, Ku'ni boyı onı jarılqasın!

¹⁶ U'lkede da'n mol bolsın, Taw baslarında da'n o'nimleri shayqalıp tursın! Masaqları Lebanon tog'ayınday mol bolsın, Qala xalqı jerdegi sho'p yan'lı ko'beysin!

¹⁷ Patshanın' atı ma'n'gi jasasın, Quyash so'ngenshe, atı o'shpesin, Ol arqalı adamlar jarılqansın, Pu'tkil xalıqlar: «Ol qanday baxıtlı», dep aytsın!

¹⁸ Jaratqan İye Qudayg'a, İzraildın' Qudayına alg'ıslar bolsın. Ka'ramatlar isleytug'ın jalg'ız Oldur.

¹⁹ Onın' ullı atına ma'n'gi alg'ıslar bolsın, Pu'tkil jer ju'zi Onın' dan'qına tolsın! Awmiyin! Awmiyin!

²⁰ İshay ulı Dawıttın' duwaları usı jerde tamamlandı.