1 Dawıttın' Yahuda sho'linde aytqan jırı
2 Quday, Sen menin' Qudayımsan', Seni barlıg'ım menen izleymen, Janım Seni an'saydı, Kewip, quwrap ha'm suwsız qalg'an jerde, Denem Sag'an intizar.
3 Muxaddes İbadatxanan'da na'zer tasladım Sag'an, Ku'sh-qu'diretin'di ha'm dan'qın'dı ko'rdim.
4 Senin' su'yispenshiligin' o'mirden abzaldur, Sonın' ushın, tilim Seni alg'ıslar.
5 O'mirim boyı Sag'an alg'ıs aytaman, Senin' atın' menen qollarımdı joqarı sozaman.
6 Maylı jilik jegendey janım toyadı, Shadlı dawıs penen awzım Sag'an alg'ısmaqtaw aytadı.
7 To'segimde jatqanımda, Seni esleymen, Tu'ni boyı Seni oylap shıg'aman.
8 Sen mag'an ja'rdemshi boldın', Qanatların'nın' sayasında shadlanıp baqıraman.
9 Kewlim Sag'an bekkem baylang'an, On' qolın' meni qollap quwatlaydı.
10 Al janımdı alıwdı qa'lep atırg'anlar, Jerdin' tu'bine tu'sip, joq boladı.
11 Olar qılıshtın' soqqısına duwshar bolıp, Sag'allarg'a jem boladı.
12 Patsha bolsa, Qudaydan shadlıq tabadı, Qudaydın' atı menen ant etkenler quwanıshın ja'riyalaydı, O'tirikshilerdin' awzı jabıladı.
