1 Atqarıwshılardın' jetekshisine. «Joq etpe» namasına aytıladı. Dawıttın' Shauldan qashıp, u'n'girge kirgende aytqan jırı
2 Rehim et mag'an, Quday, rehim et mag'an, Janım Seni panalaydı. Apat o'tip ketkenshe, Panalayman qanatların'nın' sayasında.
3 Jalbarınaman Quday Taalag'a, Men ushın iygilik qılatug'ın Qudayg'a.
4 Ko'kten mag'an qutqarılıw jiberedi, Meni quwdalag'anlarg'a keyis so'z aytadı, Quday O'z su'yispenshiligin ha'm sadıqlıg'ın jiberedi.
5 Janım arıslanlar arasında qaldı, Adam denesin jeytug'ınlardın' arasında jatırman, Tisleri nayza ha'm sadaq og'ı, Tilleri o'tkir qılısh.
6 Ko'kten de joqarı ullılana ber, Quday, Dan'qın' pu'tkil jer ju'zine jayılsın!
7 Dushpanlarım ayaqlarım astına aw tasladı, Ruwxım tu'sip ketti. Jolıma shuqır qazdı, İshine olardın' o'zleri tu'sti.
8 Menin' ju'regim Sag'an sadıq, Quday, ju'regim sadıq, Seni jırlap, saz shertemen.
9 Oyan, ha'y janım, Oyan, ha'y arfa ha'm lira, Erte tan'dı men oyatayın!
10 Xalıqlar arasında Seni alg'ıslayman, İye, Milletler arasında saz shertip, Sag'an alg'ıs aytaman.
11 Su'yispenshiligin' ko'klerge jeter, Sadıqlıg'ın' bultlarg'a ulasar.
12 Ko'kten de joqarı ullılana ber, Quday, Dan'qın' pu'tkil jer ju'zine jayılsın!
