1 Atqarıwshılardın' jetekshisine. Dawıt Bat-Sheba menen jatqannan keyin,
2 Natan payg'ambar onın' aldına kelgende, Dawıttın' aytqan jırı
3 Quday, rehim et mag'an, Su'yispenshiligin' menen. Jınayatlarımdı alıp tasla, Sheksiz miyrim-sha'pa'a'tin' menen.
4 Juwıp tasla ayıplarımdı, Pa'kle meni gu'nalarımnan.
5 Bilemen qılmıslarımdı, Gu'nam ha'r qashan turar ko'z aldımda.
6 Sag'an qarsı, jalg'ız Sag'an qarsı gu'na isledim, Senin' na'zerin'de jawızlıq bolg'an na'rsege qol urdım. Sonın' ushın, ayıplasan' Sen haqsan', Hu'kim shıg'arg'anın'da, Sen a'dilsen'.
7 Mine, gu'nakar bolıp tuwılg'anman, Anamnın' qarnında-aq gu'nakar edim.
8 Sen adamnın' kewlinde shınlıq bolıwın qa'leysen', Jan du'nyama danalıq u'yret.
9 Meni mayoran sho'bi menen pa'kle, taza bolayın, Juwa go'r meni, qardan da appaq bolayın.
10 Shadlıq ha'm quwanısh dawısın esittir mag'an, Yoshsın Sen sındırg'an su'yeklerim.
11 Ju'zin'di bur gu'nalarımnan, Alıp tasla ayıplarımdı.
12 Quday, mende taza ju'rek jarat, İshimdegi turaqlı ruwxtı jan'ala.
13 Meni da'rgayın'nan shıg'arıp taslama, Muxaddes Ruwxın'dı mennen alma.
14 Qaytara go'r mag'an qutqarılıw shadlıg'ın'dı, Boysınıw qa'lewin oyata go'r mende.
15 Jınayatshılarg'a Senin' jolın'dı u'yretemen, Gu'nakarlar qaytıp keler Sag'an.
16 Keshir meni qan to'kkenim ushın, Quday, Qutqarıwshı Quday, Tilim alg'ıslaydı Senin' a'dilligin'di.
17 Jaratqan İye, asha go'r la'blerimdi, Awzım Sag'an alg'ıslar aytsın.
18 Sen qa'lemeysen' qurbanlıqlardı, Bolmasa, Sag'an usınar edim, Jandırılatug'ın qurbanlıqtan da kewlin' tolmaydı.
19 Sag'an maqul bolatug'ın qurbanlıq – ezilgen ruwxdur, Ezilgen ha'm ta'wbe qılg'an ju'reklerden, Sen ju'z burmassan', Quday.
20 Rehim etip, Siong'a jaqsılıq qıl, Erusalim diywalların qaytadan tikle.
21 Sonda tuwrı usınılg'an qurbanlıqlar, Tolıg'ı menen jandırılatug'ın qurbanlıqlar Sag'an maqul bolar. Qurbanlıq ornın'da bug'alar usınılar.
