Dawıttın' jırı
Zabur 34 bob
1 Jaratqan İye, mag'an qarsı bolg'anlarg'a O'zin' qarsı shıq, Mag'an hu'jim qılg'anlarg'a O'zin' qarsı hu'jim qıl!
2 U'lken ha'm kishkene qalqan alıp, Mag'an ja'rdemge kel!
3 Meni quwıp kiyatırg'anlarg'a qarsı, Nayza ha'm baltan'dı al. «Seni Men qutqaraman», – dep wa'de ber mag'an!
4 Janıma qaslıq qılıp ju'rgenler, Uyatqa qalıp, masqara bolsın! Mag'an qarsı jawız niyet etkenler, Shermendesi shıg'ıp, artqa sheginsin!
5 Olar samalda ushqan qawıq sıyaqlı bolsın, Jaratqan İye, Senin' perishten' izine tu'ssin!
6 Qaran'g'ı ha'm sırg'anaq bolsın olardın' jolı, Jaratqan İye, Senin' perishten' quwsın olardı!
7 Sebepsiz mag'an tor qurdı, Meni tutıp alıw ushın, sebepsiz shuqır qazdı.
8 Tosattan olardın' basına apat kelsin, Qoyg'an torına o'zleri tu'ssin, Qazg'an shuqırına o'zleri qulasın.
9 Sonda Jaratqan İye, Sen arqalı shadlanaman, Meni qutqarg'anın' ushın quwanaman.
10 Pu'tkil barlıg'ım bılay deydi: «Ha'lsizdi ku'shlinin' qolınan, Biyshara ha'm jarlını tonawshılardan qutqaratug'ın, Sag'an uqsag'an kim bar, Jaratqan İye?»
11 Jawız niyetli gu'walar turıp, Bilmeytug'ın na'rseler haqqında mennen sorar.
12 Olar jaqsılıg'ıma jamanlıq qaytarar, Janım jalg'ızlanıp qaldı.
13 Olar kesel bolg'an waqıtta, Aza kiyim kiyip, oraza tuttım. Basımdı iyip, duwa qıldım.
14 Dostım, tuwısqanım, dep qayg'ırdım, Anam ushın aza tutqanday etip, Qayg'ıdan basımdı iyip ju'rdim.
15 Olar bolsa, jıg'ılg'anımda jıynalıp, shad boldı, Mag'an qarsı jıynaldı biytanıs adamlar, Toqtamastan meni talap tasladı.
16 Qudaysızlarday ayamay masqara qıldı, Mag'an qarap, tislerin qayradı.
17 İyem, qashang'a deyin qarap turasan'?Qutqara go'r janımdı olardın' hu'jiminen, Azat qıla go'r bul arıslanlardan!
18 Ullı ja'miyet ishinde Sag'an shu'kir aytaman, Sansız xalıq arasında Sag'an alg'ıs-maqtaw aytaman.
19 U'stimnen ku'lmesin sebepsiz mag'an dushpan bolg'anlar, Ko'zlerin alartpasın ayıpsız meni jek ko'rgenler.
20 Tınıshlıq so'zin awzına almas olar, Al elde tınısh jasap atırg'anlarg'a qarsı, Jalg'an so'zlerdi oylap tabar.
21 Mag'an qarsı awzın ken' ashıp, bılay dep aytar: «Hay-hay, o'z ko'zimiz benen ko'rdik qılmısların'dı!»
22 Ha'mmesin ko'rdin', Jaratqan İye, u'nsiz qalma, İyem, mennen uzaq bolma!
23 Oyan, tur, huqıqımdı qorg'ap, Men ushın gu'res, Qudayım, İyem!
24 A'dilligin'e go're, meni aqlay go'r, Qudayım, Jaratqan İye! U'stimnen ku'lmesin dushpanlarım!
25 Olar ishinen bılay dep aytpasın: «Hay-hay, boldı-g'o bizin' qa'legenimiz!» «Onın' basına jettik!» – demesin.
26 Awır awhalıma shadlang'anlar, Uyalıp, shermende bolsın, Mennen o'zlerin u'stin qoyg'anlar, Uyat ha'm shermendelikke shırmalıp qalsın.
27 Menin' haq bolıp shıg'ıwımdı qa'legenler, Shadlanıp baqırıp, quwansın. Tınbastan bılay dep aytsın olar: «Qulının' amanlıg'ın qa'legen Jaratqan İye ullılansın!»
28 Sonda ku'ni boyı tilimnen tu'spes Senin' a'dilligin', Sag'an arnap alg'ısmaqtaw aytaman.
