1 Atqarıwshılardın' jetekshisine. Jaratqan İyenin' qulı Dawıttın' jırı. Jaratqan İye onı pu'tkil dushpanlarınan ha'm Shauldın' qolınan qutqarg'an ku'nde, Dawıt usı jırdı Og'an arnap aytqan
2 Seni su'yemen, ku'sh-qu'diretim Sensen', Jaratqan İye!
3 Jaratqan İye – su'yengen tawım, qorg'anım ha'm qutqarıwshım. Qudayım menin' qorg'awshı jartasım, Onnan pana tabaman, Ol qalqanım, qu'diretli qutqarıwshım ha'm qorg'anımdur!
4 Maqtawg'a ılayıqlı Jaratqan İyeni shaqıraman, Qutqarılaman dushpanlarımnan.
5 A'jel arqanları shırmap alıp, Nabıt qılıw ag'ısları qorqıttı meni.
6 O'liler ma'kanının' arqanları bayladı meni, O'lim duzaqları shıqtı qarsıma.
7 Azap ishinde Jaratqan İyege jalbarındım, Ja'rdemge shaqırdım Qudayımdı. İbadatxanasınan Ol dawısımdı esitti, Qıshqırg'anım qulag'ına jetip bardı.
8 Sol waqıtta jer ju'zi titirep, shayqaldı, Silkindi tawlardın' negizgi tırnaqları, Sebebi Jaratqan İye g'a'zepke mingen edi.
9 Murnınan tu'tin ko'terildi, Awzınan jalmap jutatug'ın jalın shıg'ıp, Onnan ko'mir shog'ı jawdı.
10 Ko'klerdi jarıp, to'menge tu'sti, Qara bult Onın' ayag'ının' astında.
11 Bir kerubqa minip, Samaldın' qanatları u'stinde ushıp keldi.
12 O'zin jasırıw ushın tu'nekti perde qıldı, Qoyıw qara bultlardı O'zine shertek qıldı.
13 Onın' aldındag'ı nurdan, Burshaq ha'm ko'mir shog'ı qara bultlardı jarıp shıqtı.
14 Gu'rkiredi aspanda Jaratqan İye, Dawıs berdi Quday Taala. Burshaq ha'm ko'mir shog'ı jawdı.
15 Oqların atıp, dushpanlardı pıtırattı, Shaqmaq shaqtırıp, olardı albıratıp tasladı.
16 Jaratqan İye, Senin' keyisin'nen, Murnın'nan shıqqan ku'shli demin'nen, Suwlardın' tu'bi ko'rindi, Du'nyanın' tiykarı ashılıp qaldı.
17 Aldı meni Jaratqan İye qolın sozıp joqarıdan, Ha'm shıg'ardı teren' suwlardan.
18 Qutqardı meni ku'shli dushpanımnan, Mennen ku'shlirek bolg'an, Meni jek ko'retug'ınlardan.
19 Qarsı turdı olar mag'an basıma is tu'skende, Biraq tirek boldı mag'an Jaratqan İye.
20 Ol ken' jerge shıg'ardı meni, Kewli tolıp, qutqardı meni.
21 Jaratqan İye haqlıg'ım ushın sıy berip, Pa'k qollarım ushın esesin qaytardı.
22 Ju'rdim Jaratqan İyenin' jolı menen, Jamanlıq islemedim, Qudayımnan uzaqlasıp.
23 Ko'z aldımda saqladım barlıq qararların, Onın' qag'ıydalarınan ju'z burmadım.
24 Minsiz boldım Onın' aldında, O'zimdi saqladım gu'na islewden.
25 Esesin qaytardı Jaratqan İye haqlıg'ım ushın, Ko'z aldında qollarımnın' pa'kligi ushın.
26 Sen sadıqqa sadıqlıq ko'rsetip, Minsizge minsiz bolasan'.
27 Pa'k adamg'a pa'kligin'di ko'rsetip, Jalatayg'a jalatayshılıg'ına go're is tutasan'.
28 Kishipeyillerdi qutqarasan', Menmendi bolsa, jerge urasan'.
29 Qudayım, Jaratqan İye, shırag'ımdı jag'ıwshı, Qaran'g'ılıg'ımdı jaqtılandırıwshı Sensen'.
30 Senin' menen la'shkerlerdi qıyratıp, Qudayım menen diywallardan asarman.
31 Qudaydın' jolı minsiz, Jaratqan İyenin' so'zi isenimli, Ol qalqanı O'zinen pana izlegen ha'r bir adamnın'.
32 Jaratqan İyeden basqa Quday bar ma? Qudayımızdan basqa qorg'awshı jartas bar ma?
33 Quday meni ku'shke toltırar, Jolımdı minsiz qılar.
34 Kiyiktin' ayaqlarınday qılar ayaqlarımdı, Qoyar meni biyikliklerge.
35 U'yretedi qollarımdı urısıwg'a, Ha'm qola oq jaydı kerip tartıwg'a.
36 6Beresen' mag'an qutqarılıw qalqanın'dı, On' qolın' mag'an su'yenish boladı, Ma'rtebeli qılar ja'rdemin' meni.
37 Ken' qılarsan' basar jolımdı, Ayaqlarım menin' su'rnikpes.
38 Dushpanlarımnın' izinen quwıp, jetip aldım, Olardı joq qılmay turıp, izge qaytpadım.
39 Ezip tasladım, tura almay qaldı olar, Ayaqlarım astında sozılıp jattı.
40 Sawash ushın meni toltırdın' ku'shke, Mag'an qarsı shıqqanlardı bas iydirdin' aldımda.
41 Dushpanlarımdı mennen qashatug'ın qıldın', Men de o'zimdi jek ko'rgenlerdi joq ettim.
42 Jalbarındı olar, biraq qutqarg'an bolmadı, Jaratqan İyeni shaqırdı, biraq Ol juwap bermedi.
43 Ezdim olardı samal ushırg'an shan' sıyaqlı, Jerdegi ılay sıyaqlı shashıratıp tasladım.
44 Qutqardın' xalıqtın' ko'terilisinen, Milletlerdin' basshısı qıldın' meni, Xızmet eter o'zim tanımaytug'ın xalıqlar mag'an.
45 Men tuwralı esitiwden boysınıp, Jat elliler mag'an qullıq etti.
46 Jat ellilerdin' ju'zleri quwarıp, Shıqtı titirep, panalag'an jerlerinen.
47 Jaratqan İye tiri! Qorg'awshı jartasıma alg'ıslar bolsın! Ullılansın qutqarıwshım Quday!
48 Ol dushpanlarımnan o'sh alıwıma jol qoydı, Xalıqlardı mag'an bag'ınıshlı qıldı.
49 9Alıp shıg'ar Ol dushpanlarım arasınan, Awa, u'stin qılar mag'an qarsı shıqqanlardan, Azat qılar jawızlardın' qolınan
50 Bunın' ushın, Jaratqan İye, Ta'riyipleymen Seni xalıqlar arasında, Saz shertip alg'ıs aytaman arnap atın'a+.
51 Jaratqan İye O'z patshasın ullı jen'islerge eristirer, Maylag'an patshası Dawıtqa ha'm onın' urpag'ına, Ma'n'gige miyrim-sha'pa'a'tin ko'rseter.
