1 Haliluya! Jaratqan İyeni ta'riyiplen', Ol iygilikli, Su'yispenshiligi ma'n'gi dawam etedi.
2 Jaratqan İyenin' ullı islerin kim aytıp bere aladı? Kim Og'an ılayıqlı tu'rde alg'ıs ayta aladı?
3 Qanday baxıtlı a'dalatlıq penen is tutqanlar, Ha'mme waqıtta tuwrı islerdi qılg'anlar!
4 Jaratqan İye, xalqın'a rehim etkenin'de, esle meni, Qutqarg'anın'da, meni de itibarg'a al.
5 Tan'lag'anların'nın' ıg'balın ko'reyin, Xalqın'nın' quwanıshın ko'rip, quwanayın, Xalqın'nın' maqtanıshın birge bo'liseyin.
6 Ata-babalarımız sıyaqlı, bizler de gu'na isledik, Ayıp isler ha'm jawızlıq qıldıq.
7 Ata-babalarımız Mısırda bolg'an waqıtta, İslegen a'jayıp islerin'e itibar bermedi, Senin' mol su'yispenshiligin'di eslemedi, Ten'iz boyında, Qamıs ten'izinde qozg'alan' ko'terdi.
8 Biraq Jaratqan İye qu'diretin ko'rsetiw ushın, O'z atı ushın olardı qutqardı.
9 Qamıs ten'izine baqırdı, ten'iz qurıp qaldı, Qurg'aq jerden ju'rgizgendey, Olardı ten'iz tu'bi arqalı o'tkerdi.
10 Olardı jek ko'retug'ınlardın' qolınan qutqardı, Dushpanlarının' qolınan azat qıldı.
11 Jawların suw bastı, Olardın' hesh biri aman qalmadı.
12 Sonda ata-babalarımız Onın' so'zine isendi, Onı alg'ıslap, qosıq ayttı.
13 Degen menen, olar Jaratqan İyenin' islerin da'rhal umıttı, Onın' ko'rsetetug'ın jol-jorıg'ın ku'tip otırmadı.
14 Sho'lde olar na'psixorlıqqa berildi, İzsiz dalada Qudaydı sınadı.
15 Quday olardın' sorag'anın berdi, Biraq olarg'a awır kesellik jiberdi.
16 Ordada olar Muwsanı, Jaratqan İyenin' muxaddesi bolg'an Xarondı ku'nledi,
17 Jer jarılıp, Datandı jutıp jiberdi, Abiram menen onın' sheriklerin jalmadı.
18 Olardın' izinen ju'rgenlerge ot tu'sti, Jalın jandırıp jiberdi jawızlardı.
19 Xoreb tawında tananın' mu'sinin islep aldı, Sol quyıp islegen butına tabındı.
20 Sho'p jeytug'ın tananın' mu'sinine, Qudaydın' ullılıg'ın almastırdı.
21 Olar umıttı o'zlerin qutqarg'an Qudaydı, Mısırda ullı islerdi islegendi,
22 Xam u'lkesinde a'jayıp islerdi ko'rsetkendi, Qamıs ten'izinde tan' qalarlıq islerdi qılg'andı.
23 Sonın' ushın, Quday olardı joq qılatug'ının ayttı, Biraq tan'lag'an adamı Muwsa arag'a tu'sip, Onı qurtaman degen g'a'zebinen qaytardı.
24 Keyin a'jayıp elden ju'z burdı, Qudaydın' bergen wa'desine isenbedi.
25 O'z shatırlarında ton'qıldadı, Jaratqan İyenin' aytqanlarına qulaq salmadı.
26 Sonın' ushın, Jaratqan İye ant iship: «Sizlerdi sho'lde qurtıp taslayman,
27 Urpaqların'ızdı milletler arasına tarqataman, O'zge ellerge shashıp jiberemen», – dedi.
28 Olar Peordag'ı Baalg'a baylanıp qaldı, O'lilerge berilgen qurbanlıq go'shinen jedi.
29 Olar o'z qılmısları menen Jaratqan İyeni g'a'zeplendirdi, Sonlıqtan oba keselligi olardın' arasına jayıldı.
30 Pinexas turıp, arag'a tu'sti, Sonda apat ta toqtadı.
31 Onın' bul isi a'dillik sanalıp, A'wladtan-a'wladqa ma'n'gi dawam etedi.
32 Meriba suwları janında olar Jaratqan İyeni ja'ne g'a'zeplendirdi, Olar sebepli Muwsanın' basına qayg'ı tu'sti.
33 Olar Muwsanın' ashıwına tiydi, Ol da oylanbastan so'yledi.
34 Jaratqan İye joq etiwdi buyırsa da, Olar joq etpedi xalıqlardı.
35 Basqa xalıqlar menen aralastı, Olardın' u'rp-a'detlerin u'yrendi.
36 Olardın' butlarına tabındı, Butlar olar ushın duzaq boldı.
37 Ul ha'm qızların, Jinlerge qurbanlıq qıldı.
38 Qanan butlarına qurbanlıq bolsın dep, Ul ha'm qızlarının' qanın, Ayıpsızlardın' qanın to'kti. El to'gilgen qan sebepli haramlandı.
39 Olar isleri menen haram boldı, Qılmısları menen opasızlıq qıldı.
40 Jaratqan İyenin' g'a'zebi lawladı xalqına qarsı, Jerkendi O'zinin' menshik xalqınan.
41 Olardı basqa xalıqlarg'a ta'slim qıldı, Jek ko'retug'ınları olarg'a hu'kimdar boldı.
42 Dushpanları olardı ezdi, Olardın' qol astında basları iyildi.
43 Jaratqan İye olardı ko'p ma'rte qutqardı, Biraq olardın' aqıl-esi qozg'alan' ko'teriw boldı, Gu'naları sebepli pa'ske urıldı.
44 Sonda da, Jaratqan İye xalıqtın' qıyınshılıg'ına itibar berdi, Dadpa'riyadına qulaq saldı.
45 Olar haqı O'z kelisimin esledi, Ullı su'yispenshiligi sebepli olarg'a rehim qıldı.
46 Olardı tutqıng'a alg'anlardı, Rehimli bolıwg'a iytermeledi.
47 Qutqar, Qudayımız Jaratqan İye, Milletler arasınan bizlerdi jıyna. Muxaddes atın'dı ta'riyipleyik, Alg'ısqa ılayıq islerin' menen maqtanayıq.
48 A'zelden ma'n'gige deyin, İzraildın' Qudayı Jaratqan İyege alg'ıslar bolsın! Pu'tkil xalıq: «Awmiyin!» – desin. Haliluya!
