1 Jaratqan İyeni alg'ıslap, atın aytıp shaqırın', Onın' islerin xalıqlar arasında bildirin'!
2 Onı jırlap, saz shertip alg'ıs aytın', Barlıq a'jayıp islerin ja'riya qılın'!
3 Onın' muxaddes atı menen maqtanın', Jaratqan İyeni izlegenler shadlansın!
4 Jaratqan İyeni ha'm Onın' qu'diretin, Onın' da'rgayın tınımsız izlen'!
5 Umıtpan' Onın' a'jayıp islerin, Onın' ka'ramatların ha'm shıg'arg'an hu'kimlerin,
6 Ha'y, Onın' qulı İbrayımnın' a'wladı, Quday tan'lag'an Yaqıptın' urpag'ı!
7 Ol – Qudayımız Jaratqan İyedur, Shıg'arg'an hu'kimleri pu'tkil jer ju'zindedur.
8 Ma'n'gi esleydi O'z kelisimin, Mın'lap a'wladlarg'a bergen wa'desin,
9 İbrayım menen du'zgen kelisimin, Isaqqa ant iship, bergen wa'desin.
10 Bunı Yaqıp ushın bir qag'ıyda etip tastıyıqladı, İzrail ushın ma'n'gi bir kelisim qıldı.
11 Ol bılay dedi: «Qanan jerin sag'an beremen, Onı payın'ızg'a tu'sken mu'lik etip beremen».
12 Sol waqıtta olar sanı jag'ınan az edi, Sol jerde az sanlı ha'm kelgindi edi.
13 Bir xalıqtan ekinshi xalıqqa, Bir elden ekinshi elge gezip ju'rdi.
14 Jaratqan İye hesh kimnin' olardı eziwine jol qoymadı, Olar ushın patshalarg'a eskertiw berip,
15 Bılay dedi: «Maylag'anlarıma tiymen', Payg'ambarlarıma jamanlıq qılman'!»
16 Elge ashlıq jiberdi, Bir tislem nang'a zar qıldı.
17 Olardın' aldınan bir adamdı jiberdi, Awa, Yusup qul bolıp satıldı.
18 Onın' ayaqları shınjırlandı, Moynına bug'aw salındı.
19 Onın' aytqanları orınlang'ansha, Jaratqan İyenin' so'zi onı sınadı.
20 Patsha adam jiberip, Yusupti bosattı, Xalıqlardın' hu'kimdarı onı azat qıldı.
21 Onı o'z sarayının' basqarıwshısı, Pu'tkil iyeliginin' hu'kimdarı etip tayınladı.
22 Qa'lese, xızmetkerimdi shınjırlasın, Aqsaqallarıma danalıq u'yretsin, dedi.
23 Keyin İzrail Mısırg'a keldi, Yaqıp Mısırg'a, yag'nıy Xam u'lkesine ornalastı.
24 Jaratqan İye onın' xalqın bereketledi, Dushpanlarına qarag'anda, olardın' sanın ko'beytti.
25 Keyin İyemiz Mısır xalqının' ju'reginde, O'z xalqına degen jek ko'riwshilik oyattı. Mısır xalqı Onın' qullarına qarsı, Hiylekerlik qıla basladı.
26 Ol O'z qulı Muwsanı, O'zi tan'lap alg'an Xarondı jiberdi.
27 Olar ko'rsetti Jaratqan İyenin' ka'ramatlı belgilerin, Xam u'lkesinde a'jayıp islerin.
28 Jaratqan İye qaran'g'ılıq jiberip, eldi tas tu'nek qıldı, Muwsa menen Xaron Onın' so'zlerine qarsı shıqpadı.
29 Olardın' suwların qang'a aylandırdı, Ondag'ı balıqlardı nabıt qıldı.
30 Mısır jeri qurbaqalarg'a tolıp ketti, Ha'tteki, patshasının' bo'lmesine kirdi.
31 Jaratqan İye buyırg'anda, iytshıbın ushıp keldi, Shirkeyler pu'tkil eldi qapladı.
32 Jawınnın' ornına burshaq jawdırdı, Shaqmaq shaqtırdı olardın' elinde.
33 Ju'zimzarların ha'm a'njir ag'ashların qurttı, Eldegi barlıq tereklerdi sındırdı.
34 Ol buyırg'anda, shegirtkeler keldi, Sansız shekshekler payda boldı.
35 Olar eldegi barlıq o'simliklerdi, Atızlardag'ı eginlerdi jep tawıstı.
36 Jaratqan İye eldegi tun'g'ıshlardın' ha'mmesin, Ha'r birinin' belindegi ku'shinin' birinshi jemisi bolg'an balaların o'ltirdi.
37 İzraillılardı elden gu'mis ha'm altın menen shıg'ardı, Urıwlarının' ishinde su'rnikkeni bolmadı.
38 Olar shıg'ıp ketkende, Mısır quwandı, Mısır xalqı İzraildan qorqıp qalg'an edi.
39 Jaratqan İye İzraildı bult penen jawdı, Tu'nde jaqtı bolsın, dep ot berdi.
40 Xalıq sorag'anda, olarg'a bo'deneler jiberdi, Aspannan nan jawdırıp, olardı toydırdı.
41 Tastı jardı, suw atlıg'ıp shıqtı, Quwrag'an jerden da'rya bolıp aqtı.
42 Ol O'z muxaddes wa'desin, Qulı İbrayımg'a bergen so'zin yadına aldı.
43 Xalqın quwanısh ishinde, Tan'lag'anların shadlıq penen elden alıp shıqtı.
44 Basqa milletlerdin' jerlerin olarg'a berdi, Sol xalıqlardın' miynetin mu'lik qılıp aldı.
45 Ol «buyrıqlarımdı orınlasın, Nızamlarıma boysınsın» dep usılay isledi. Haliluya!
