Ayup 38 bob
1 Sonnan keyin, Jaratqan İye quyın ishinen Ayupqa bılay dedi:
2 – Bilimsiz so'zlerin' menen, Danalıq sheshimlerime gu'man keltiretug'ınday, sen kim bolıpsan'?
3 Erkek kibi belin'di bekkem buw, Men sorayman, sen juwap ber.
4 Men jerdin' negizin ornatqanda, sen qay jerde edin'? Biletug'ın bolsan', mag'an ayt.
5 Onın' o'lshemin belgilegen kim? Onın' u'stinen jip tartqan kim? Sen onı bilesen'-g'o!
6 Jerdin' tiykarları nenin' u'stine qoyılg'an? Onın' irgetasın qoyg'an kim?
7 Sol waqıtta tan' juldızları birge qosıq aytıp, İla'hiy barlıqlar quwanısh penen qıshqırısqan edi.
8 Ten'iz jer tu'binen atılıp shıqqanda, Og'an qapılar qoyıp, bo'get basqan kim edi?
9 Men og'an bultlardı kiyim, Qara tu'nekti jo'rgek qıldım.
10 Shegaralar belgilep, Ten'izge ta'mbilengen qapılar qoydım.
11 Son'ınan og'an: «Mına jerge deyin kelesen', onnan o'tpeysen', Senin' o'rko'kirek tolqınların' usı jerde toqtaydı», – dedim.
12 Sen o'mirin'de bir ma'rte bolsa da, tan'g'a buyrıq berdin' be? Yamasa tan' shug'lasına ornın belgilep berdin' be?
13 Og'an jerdin' tu'p-tu'pkirlerine jetip barıp, Zalımlardı jasırıng'an jerinen silkip shıg'arıwdı buyırdın' ba?
14 Jer ju'zi ılayg'a mo'r basılg'anday bolıp, o'zgeredi, Kiyim kiygendey bolıp bezenedi.
15 Zalımlar ku'n nurınan mahrum etiledi, Ko'terilgen qolları sındırıladı.
16 Sen ten'izdin' suw ko'zlerine tu'sip ko'rdin' be? Yamasa ten'iz tu'bin izertlep ko'rdin' be?
17 Sag'an o'liler ma'kanının' da'rwazaları ko'rsetilip pe edi? Yamasa qara tu'nektin' da'rwazaların ko'rip pe edin'?
18 Jer ken'isligin tu'sindin' be? Eger bulardın' ha'mmesin bilgen bolsan', onda tu'sindir!
19 Nurdın' ma'kanına alıp baratug'ın jol qayda? Al qaran'g'ılıqtın' ma'kanı qay jerde?
20 Olardı o'z ornına qaytara alasan' ba? Olardın' u'yine baratug'ın joldı bilesen' be?
21 Awa, sen bilesen'! Sen olardan burın tuwılg'ansan'! Ju'da' uzaq o'mir ko'rip atırsan'!
22 Sen qar saqlanatug'ın jerge kirdin' be? Yamasa burshaq saqlanatug'ın jerdi ko'rdin' be?
23 Men olardı apat ku'nleri ushın, Urıs ha'm sawash ku'nleri ushın saqlap qoyıppan.
24 Jaqtılıqtın' qay jerden kelip, Shıg'ıs samalının' qay jerden baslanatug'ının bilesen' be?
25 Kim no'ser jawın ushın arna, Jıldırım ushın jol ashtı?
26 Adam jasamaytug'ın jerlerge, Bos qalg'an sho'llerge jawın jawdıratug'ın kim?
27 Kereksiz quw sho'ldi suwg'a qandırıp, Ol jerlerge sho'pler o'siretug'ın kim?
28 Jawınnın' a'kesi bar ma? Shıq tamshıların du'nyag'a keltirgen kim?
29 Muz kimnin' qursag'ınan shıqtı? Aspannan tu'sken qırawdı kim tuwdı?
30 Suwlar tastay bolıp qatıp qaladı, Ten'izdin' beti muzlap qaladı.
31 U'rkerdin' shınjırların baylay alasan' ba? Yamasa Orionnın' jiplerin sheshe alasan' ba?
32 Juldızlar toparın o'z waqtında shıg'ara alasan' ba? Yamasa Jeti qaraqshını balaları menen birge jeteley alasan' ba?
33 Sen aspang'a tiyisli qag'ıydalardı bilesen' be? Yamasa sol nızamlardı jer betinde ornata alasan' ba?
34 U'stime no'ser jawın jawsın dep, Bultlarg'a baqırıp, buyrıq bere alasan' ba?
35 Shaqmaqlarg'a shag'ıwdı buyıra alasan' ba? Olar sag'an: «Bizler senin' xızmetin'demiz», – der me eken?
36 Ju'rekke danalıq, Aqılg'a tu'sinik bergen kim?
37 Bultlardı sanawg'a kimnin' danalıg'ı jetedi? Kim aspandag'ı suw meslerin awdarıp taslay aladı?
38 Sonda shan' ılayg'a aylanıp, Kesekler bir-birine jabısadı.
39 Jas arıslanlar uyasında jasırınıp, Urg'ashı arıslan olja an'lıp, puta astında jatırg'anda, Sen urg'ashı arıslang'a olja tutıp bere alasan' ba?
40 Yamasa jas arıslanlardın' qarnın toydıra alasan' ba?
41 G'arg'anın' balaları ashlıqtan qan'g'ıp ju'rip, Qudayg'a jalıng'anda, Olardı azıq penen ta'miyinleytug'ın kim?
