Ayup 36 bob
1 Elihu so'zin dawam etip, ja'ne bılay dedi:
2 – Biraz sabır qılın'lar, men sizlerge ko'rseteyin, Ele Quday ushın aytatug'ın so'zlerim bar.
3 Men bilimimdi tu'rli dereklerden topladım, Jaratıwshımnın' a'dilligin da'lillep bereyin.
4 Shınında, so'zlerim de jalg'an emes, Qarsın'ızda bilimi jetik bir adam tur.
5 A'lbette, Quday qu'diretli, Biraq Ol hesh kimdi pa's ko'rmeydi, Onın' qu'direti de, danalıg'ı da sheksiz.
6 Ol zalımlardın' jasay beriwine jol qoymaydı, Al jarlılarg'a a'dalatlıq qıladı.
7 Ol a'dillerden ko'zlerin ayırmaydı, Olardı patshalar sıyaqlı taxtqa otırg'ızıp, Ma'n'gige ma'rtebeli qıladı.
8 Eger a'diller shınjır menen baylang'an, Azap duzag'ına tu'sirilgen bolsa,
9 Onda Quday olardın' gu'naların, Menmensip islegen qılmısların o'zlerine ko'rsetedi.
10 Ta'lim alsın dep, olardın' qulaqların ashadı, Ha'm jawızlıqtan bas tartıwdı buyıradı.
11 Eger olar Qudayg'a boysınıp, Og'an xızmet etse, Onda olardın' qalg'an ku'nleri baxıtqa, Jılları shadlıqqa tolı boladı.
12 Al eger olar Qudayg'a boysınbasa, qılıshtan o'tkerilip, Bilim almastan, o'lip ketedi.
13 Qudaysızlardın' ishi g'a'zepke tolı boladı, Quday olardı kisenlese de, ja'rdem soramaydı.
14 Olar jaslay o'ledi, O'miri shermendelik penen ayaqlanadı.
15 Quday qıynalg'anlardı shekken azapları arqalı qutqaradı, Mashqalalarg'a duwshar etiw arqalı O'zin tın'laytug'ın qıladı.
16 Ol sizdi de da'rtten azat etip, Qa'wipsiz, sheklenbegen ken'islikke alıp shıg'ar, Dasturxanın'ızdı la'zzetli tag'amlarg'a toltırar edi.
17 Biraq siz zalımlar alatug'ın jazanı tolıq alg'ansız, Hu'kim ha'm a'dalat jag'an'ızg'a asılıp alg'an.
18 G'a'zepleniwden saqlanın', baylıq sizdi azg'ırmasın, Mol para da sizdi joldan urmasın.
19 Baylıg'ın'ız, ku'sh-qu'diretin'iz, Sizdi da'rtten qutqara ala ma?
20 Sonlıqtan xalıqlar o'z ornınan, Joq qılınatug'ın tu'ndi an'saman'.
21 Jawızlıqqa ju'z burıwdan saq bolın', Siz apattan go're, gu'nanı tan'lag'an ko'rinesiz.
22 – Bilip qoyın'ız, Qudaydın' qu'direti ullı, Ol kibi ta'lim beretug'ın ustaz bar ma?
23 Kim Og'an ju'retug'ın jolın belgilep beredi? Yamasa kim Og'an: «Mına isin' nadurıs», – dep ayta aladı?
24 Qudaydın' islerin alg'ıslawdı umıtpan'ız, Adamlar sol haqqında ta'riyiplew qosıqların aytadı.
25 Barlıq adamlar Onın' islerine tan' qalıp, Ha'r bir adam olarg'a uzaqtan qaraydı.
26 Awa, Quday ullı, bizler Onı tu'sine almaymız, Onın' o'mir jıllarının' sanı da aqılg'a sıymaydı.
27 Ol suw puwların ko'terip alıp, Olardı jawın tamshılarına aylandıradı.
28 Bultlar suw tamshıların to'gedi, Ol adamlardın' u'stine no'ser bolıp quyadı.
29 Bultlardın' qalay jayılatug'ının, Onın' shatırınan shıqqan gu'ldirmamanın' qalay gu'rkireytug'ının kim tu'sine aladı?
30 Quday ko'kte shaqmag'ın shaqtırg'anda, Onı ten'izdin' tu'binen ko'riwge boladı.
31 Quday xalıqlarg'a usılay biylik ju'rgizip, Mol azıq-awqat beredi.
32 Ol shaqmaqtı O'z qollarında saqlap, Nıshang'a barıp tiyiwge buyrıq beredi.
33 Gu'rkirew dawıldan xabar beredi, Ha'tte, mallar da dawıldın' bolatug'ının sezedi.
