Ayup 32 bob
1 Ayup o'z na'zerinde haq bolg'anlıqtan, u'sh dostısı onın' menen tartısıwdı toqtattı.
2 Biraq Ayup o'zin aqlap, Qudaydı ayıplag'anı ushın, Ram a'wladınan, Buz tiyresinen bolg'an Baraxel ulı Elihudın' Ayupqa ashıwı keldi.
3 Sonday-aq, Ayuptı ayıplag'anı menen, og'an jo'nli juwap qaytara almag'anı ushın, onın' u'sh dostısına da ashıwı keldi.
4 Elihu Ayup penen so'ylesiw ushın o'zinin' gezegin ku'tti. O'ytkeni basqalardın' jası onnan u'lkenirek edi.
5 Biraq sol u'sh adamnın' basqa ga'pi joqlıg'ın ko'rgende, Elihu ashıwg'a mindi.
6 Solay etip, Buz tiyresinen bolg'an Baraxel ulı Elihu so'zin baslap, bılay dedi: – Menin' jasım kishi, sizler bolsan'ız jası u'lkensizler, Sonlıqtan batına almadım, o'z bilgenimdi sizlerge aytıwg'a qorqtım.
7 Jası u'lkenler so'ylesin, Ko'p jasag'anlar danalıqtan sabaq bersin, dedim.
8 Biraq adamg'a ishindegi ruwx, Qu'direti ku'shli Qudaydın' demi aqıl beredi.
9 Sonlıqtan tek jası u'lkenler dana bolmaydı, Tek ko'p jasag'anlar g'ana nenin' durıs ekenin tu'sine bermeydi.
10 Sol sebepli: «Meni tın'lan', Men de o'z bilgenimdi bayan eteyin», – deymen.
11 Sizler so'ylegenin'izde, men ku'ttim, Sizler ne aytıwdı izlep atırg'anın'ızda, Aqıllı so'zlerin'izge qulaq tu'rdim.
12 Sizlerdi bar dıqqatım menen tın'ladım. Biraq hesh birin'iz Ayuptın' nahaqlıg'ın da'lilley almadın'ız, Hesh birin'iz onın' so'zlerine juwap bermedin'iz.
13 «Bizler dana joldı taptıq: Ayuptı adam emes, al Qudaydın' O'zi jen'sin», – demen'ler.
14 Ayup so'zlerin mag'an qarsı aytpadı, Degen menen, og'an sizlerdin' so'zlerin'iz benen juwap bermegen bolar edim.
15 Sizler irenjip, so'z tappay otırsızlar, Aytatug'ın so'zin'iz de qalmadı.
16 Sizler u'ndemey, juwap bermey tura bersen'iz, Men de ku'tip tura beriwim kerek pe?
17 Menin' de aytar so'zim bar, Men de o'z bilgenimdi bayan etpekshimen.
18 İshim so'zlerge tolg'an, İshimdegi ruwx meni zorlamaqta.
19 Ju'regim ashılmag'an sharap kibi, Jan'a sharap quyılg'an mes kibi, jarılıp keteyin dep tur.
20 So'yleyin, janım jay tapsın, Awız ashıp, juwap bereyin.
21 Men hesh kimnin' bet-ju'zine qaramayman, Hesh kimge jag'ımpazlıq qılmayman.
22 Men jag'ımpazlıq qılıwdı bilmeymen, Bolmasa, Jaratıwshım meni da'rriw joq qılg'an bolar edi.
