Ayup 26 bob
1 Sonda Ayup bılay dep juwap berdi:
2 – Ah, ha'lsizge sen qalay ja'rdem berdin'! Ku'shsizge qalay ma'det berdin'!
3 Aqılsızg'a qalay ma'sla'ha't berdin'! Danalıqtı qalay teren' tu'sindire aldın'!
4 Bul so'zlerdi aytıwg'a sag'an kim ja'rdem berdi? Sen arqalı so'ylegen kimnin' ruwxı?
5 Suwlardın' ha'm olardag'ı tirishiliktin' astında ma'kan basqan, O'lilerdin' ruwxları titireydi.
6 O'liler ma'kanı Qudaydın' aldında jalan'ash, Nabıt bolıw ma'kanının' da japqıshı joq.
7 Quday ko'klerdin' arqa ta'repin boslıqqa jayıp qoydı, Jerdi de boslıqqa asıp qoydı.
8 Ol suwlardı O'z bultlarının' ishine salıp qoydı, Biraq bultlar suwlardın' awırlıg'ınan jırtılıp ketpeydi.
9 Ol taxttın' u'stin jawıp qoyıp, U'stine O'z bultların jaydı.
10 Suwlardın' betin shegaralap sızıp, Jaqtılıqtı qaran'g'ılıqtan ayırdı.
11 Quday abay etkende, Aspannın' su'tinleri qaltırasıp, titiresedi.
12 Ol O'z ku'shi menen ten'izdi tınıshlandırdı, O'z aqılı menen ten'iz aydarhası Rahabtı joq qıldı.
13 O'z demi menen bultlardı quwıp, aspandı ashıq qıldı, Qolları menen qashıp baratırg'an u'lken jılandı joq qıldı.
14 Bul Onın' islerinin' kishkene bir bo'legi g'ana, Ol haqqında esitkenlerimiz sıbırlap aytılg'anday ju'da' az. Onın' qu'diretinin' gu'rkirewin kim tu'sine aladı?
