Ayup 1 bob
1 Us u'lkesinde Ayup atlı bir adam jasaytug'ın edi. Ol minsiz ha'm a'dil bolıp, Qudaydan qorqatug'ın, jamanlıqtan awlaq ju'retug'ın adam edi.
2 Ayuptın' jeti ulı ha'm u'sh qızı bar edi.
3 Ol jeti mın' qoy, u'sh mın' tu'ye, bes ju'z jup o'giz, bes ju'z urg'ashı eshek, sonday-aq, ju'da' ko'p xızmetshilerge iye bolıp, shıg'ısta jasaytug'ınlar arasında en' bay adam edi.
4 Ayuptın' ulları u'ylerinde gezek penen zıyapat berip, o'zleri menen iship-jew ushın, u'sh apa-sin'lisin de mira't etetug'ın edi.
5 Zıyapat tamam bolg'annan keyin, Ayup balaların shaqırtıp alıp, pa'kleniw ra'siminen o'tkeretug'ın edi. Ol ullarım ishlerinen Qudayg'a til tiygizip, gu'na islep qoyg'an bolıwı mu'mkin, dep oylap, azan menen olardın' ha'r biri ushın jandırılatug'ın qurbanlıq beretug'ın edi. Ayup ba'rqulla usılay isleytug'ın edi.
6 Bir ku'ni ila'hiy barlıqlar Jaratqan İyenin' aldına kelgende, olar menen birge shaytan da kelgen edi.
7 aratqan İye shaytannan: – Sen qay jerden kiyatırsan'? – dep soradı. Shaytan Jaratqan İyege: – Men jer betin gezip, onın' ha'mme jerin aylanıp shıqtım, – dep juwap berdi.
8 Jaratqan İye shaytang'a: – Qulım Ayupqa ser saldın' ba? Jer betinde ol sıyaqlı minsiz, a'dil, Mennen qorqatug'ın ha'm jamanlıqtan awlaq ju'retug'ın adam joq, – dedi.
9 Sonda shaytan Jaratqan İyege bılay dep juwap berdi: – Ayup Sennen biykardan-biykarg'a qorqadı dep oylaysan' ba?
10 Onın' o'zin, u'y-ishin ha'm barlıq iyeligin qorg'ap ju'rgen O'zin' emessen' be? Sen onın' qolı tiygen ha'r bir iske bereket berip atırsan'. Onın' pada ha'm su'riwleri pu'tkil u'lkege jayılg'an.
11 Biraq qolın'dı sozıp, og'an tiyisli bolg'annın' ha'mmesin joq qılsan', onda ol ju'zin'e tik qarap, Sag'an na'let aytadı.
12 Jaratqan İye shaytang'a: – Yaqshı, Ayupqa tiyisli bolg'annın' ha'mmesin senin' qolın'a beremen, biraq onın' o'zine zıyan tiygizbe, – dedi. Solay etip, shaytan Jaratqan İyenin' da'rgayınan ketti.
13 Bir ku'ni Ayuptın' ulları menen qızları u'lken a'jag'asının' u'yinde zıyapat berip, sharap iship otırg'an edi.
14 Sonda bir xabarshı juwırıwı menen Ayupqa kelip, bılay dedi: «O'gizlerin'iz jer aydap, eshekler olardın' qasında otlap ju'rgen edi.
15 Birden shebalı basqınshılar hu'jim jasap, xızmetshilerin'izdin' ha'mmesin qılıshtan o'tkerdi ha'm mallardı aydap alıp ketti. Bul xabardı sizge jetkiziw ushın, jalg'ız men g'ana qashıp qutıldım».
16 Ol so'zin tamamlap u'lgermey-aq, basqa bir xabarshı kelip, bılay dedi: «Aspannan Qudaydın' jalını tu'sip, qoyların'ız benen shopanların'ız janıp, ku'lge aylandı. Bul xabardı sizge jetkiziw ushın, jalg'ız men g'ana aman qaldım».
17 Sol adam so'zin tamamlap u'lgermey-aq, u'shinshi xabarshı jetip kelip bılay dedi: «Kaldeyler u'sh topar bolıp kelip, tu'yelerdin' padasına taslandı. Olar barlıq padashılardı o'ltirip, tu'yelerdi aydap ketti. Bul xabardı sizge jetkiziw ushın, jalg'ız men g'ana qashıp qutıldım».
18 Ol usı so'zlerdi aytıp turg'anda, basqa bir xabarshı kelip, bılay dedi: «Sizin' ul-qızların'ız u'lken a'jag'asının' u'yinde awqatlanıp, sharap iship otırg'an edi.
19 Birden sho'l ta'repten ku'shli dawıl ko'terilip, jaydı to'rt ta'repinen soqqılay basladı. U'y qulap, onın' ishindegilerdin' ha'mmesi o'ldi. Bul xabardı jetkiziw ushın, jalg'ız men g'ana aman qaldım».
20 Sonda Ayup ornınan turdı da, qayg'ıdan shapanın jırttı ha'm shashın aldırıp tasladı. Keyin et-betinen jerge jıg'ılıp, sıyındı.
21 Ol bılay dedi: «Anamnın' qursag'ınan jalan'ash shıqqan edim, Bul du'nyadan da jalan'ash qaytaman. Jaratqan İye berdi, Jaratqan İye aldı, Jaratqan İyenin' atına alg'ıslar bolsın!»
22 Sonsha is bolıp o'tse de, olardın' hesh birinde Ayup gu'na islemedi, Qudaydı da ayıplamadı.
