Ester 2 bob
1 Patsha Axashweroshtın' ashıwı basılg'annan keyin, ol Washtiydi, onın' islegen isin ha'm og'an qarsı shıg'arılg'an hu'kimdi esine tu'sirdi.
2 Patshanın' arnawlı xızmetshileri: «Patshamız ushın jas, sulıw ha'm pa'k qızlar izlensin.
3 Bunın' ushın patshanın' qolı astındag'ı barlıq wa'layatlarda baqlawshılar tayınlansın. Olar jas, sulıw ha'm pa'k qızlardı Suza qalasındag'ı hayal-qızlar sarayına jıynatıp, patshanın' hayallarına qaraytug'ın aqtası Hegaydın' qarawına tapsırsın ha'm olarg'a iyisli zatlar menen pardoz berilsin.
4 Patshamızg'a unag'an qız Washtiydin' ornına xanbiyke bolsın», – dedi. Bul ga'p patshag'a maqul boldı ha'm ol solay isledi.
5 Suza qalasında Benyamin urıwınan bolg'an Mordoxay degen bir yahudiy jasaytug'ın edi. Ol Yair degen adamnın' ulı bolıp, Yair Shimeydin', al Shimey Kishtin' ulı edi.
6 Kish Yahuda patshası Exoniya menen birge Babilon patshası Nabuxodonosor ta'repinen Erusalimnen su'rgin etilip alıp kelingenlerdin' biri edi.
7 Mordoxayg'a a'kesi jag'ınan tuwısqan bolg'an Hadassa atlı bir qız bar edi. Basqa atı Ester bolg'an Hadassa ata-anasınan jetim qalg'annan son', Mordoxay onı asırap alıp ta'rbiyaladı. Qız qa'ddiqa'wmeti kelisken, sulıw edi.
8 Patshanın' buyrıg'ı menen pa'rmanı ja'riyalang'annan son', ko'p qızlar Suza qalasına a'kelinip, hayal-qızlar ushın juwapker bolg'an Hegaydın' qarawına tapsırıldı. Patsha sarayına a'kelingen qızlardın' ishinde Ester de bar edi.
9 Hegay Esterdi unattı ha'm og'an kewli toldı. Ol Esterge pardozlanıwı ushın kerekli zatlardı ha'm og'an arnalg'an azıqawqatlardı beriwge asıqtı. Og'an xızmet etiw ushın patsha sarayınan saylang'an jeti qızdı belgiledi. Esterdi ha'm onın' qa'nizeklerin hayalqızlar sarayının' en' jaqsı bo'lmesine jaylastırdı.
10 Ester o'z xalqı ha'm o'z ata tegi haqqında ashıq aytpadı. Sebebi Mordoxay og'an bul tuwralı awız ashpawdı buyırg'an edi.
11 Mordoxay ha'r ku'ni Esterdin' awhalınan xabar alıw ushın ha'm og'an ne bolıp atırg'anın biliw ushın hayal-qızlar sarayının' ha'wlisi a'tirapında ju'retug'ın edi.
12 Patsha Axashweroshtın' aldına kiriw gezegi kelgenshe, ha'r bir jas qızg'a on eki ay dawamında pardoz beriletug'ın edi. Qızlar ushın shıg'arılg'an qag'ıyda usınday bolıp, olarg'a altı ay mirra mayı, altı ay a'tir mayları ha'm pardozlaytug'ın zatlar jag'ılatug'ın edi.
13 Son'ınan qız patshanın' aldına kiretug'ın edi. Qız patsha sarayına kirer aldınan hayallar sarayınan neni alıwdı qa'lese, og'an ha'mmesi beriletug'ın edi.
14 Keshte patshanın' bo'lmesine kirgen qız erten'ine azanda patshanın' toqallarına qaraytug'ın aqtası Shaashgazdın' baqlawı astındag'ı ekinshi hayallar sarayına qaytatug'ın edi. Patshag'a unamag'an ha'm atı aytıp shaqırılmag'an qız patshanın' janına qaytıp kire almaytug'ın edi.
15 Patshanın' bo'lmesine kiriw gezegi Mordoxaydın' asırap alg'an qızına, yag'nıy onın' ag'ası Abixayıldın' qızı Esterge kelgende, ol patshanın' hayalların qarawıllaytug'ın aqtası Hegaydın' aytqanların g'ana aldı ha'm basqa hesh na'rse soramadı. Ester o'zin ko'rgen ha'r bir adamnın' kewline unap qaldı.
16 Solay etip, Axashweroshtın' patshalıq etiwinin' jetinshi jılının' onınshı ayı, Tebet ayında Ester patsha Axashweroshtın' sarayına aparıldı.
17 Patsha Esterdi basqa qızlardan go're ko'birek jaqsı ko'rip qalıp, og'an kewli toldı ha'm Esterdi basqa hayal-qızlarg'a qarag'anda ko'birek unattı. Axashwerosh Esterdin' basına taj kiydirip, onı Washtiydin' ornına xanbiyke etip qoydı.
18 Son'ınan patsha barlıq wa'zirleri ha'm xızmetshileri ushın Esterdin' hu'rmetine u'lken zıyapat berdi. Ol wa'layatlarg'a bayram ja'riya etti ha'm patshalarg'a ılayıq saqıylıq penen sawg'alar u'lestirdi.
19 Qızlar ekinshi ret jıynalg'anda, Mordoxay sarayda o'z xızmetin atqarıp otırg'an edi.
20 Ester Mordoxaydın' buyrıg'ı boyınsha o'zinin' ata tegi ha'm xalqı haqqında ele hesh na'rse aytpag'an edi. Ester Mordoxaydın' ta'rbiyasında bolg'an waqtında og'an qalay boysınatug'ın bolsa, ha'zir de solay boysınatug'ın edi.
21 Sol ku'nleri Mordoxay sarayda o'z xızmetin atqarıp otırg'anda, da'rwaza saqshıları bolg'an Bigtan ha'm Teresh degen eki aqta patsha Axashweroshqa ashıwlanıp, onı o'ltiriwdi rejelestirdi.
22 Mordoxay bul isti bilgende, xanbiyke Esterge xabarladı. Ester onı Mordoxaydın' atınan patshag'a jetkizdi.
23 Bul waqıya tekserilip, durıs dep tabıldı ha'm eki saqshı da darg'a asıldı. Keyin bul waqıya jılnama kitabına patshanın' ko'z aldında jazıp qoyıldı.
