Ester 1 bob
1 Bul waqıya patsha Axashweroshtın' da'wirinde bolg'an edi. Axashwerosh Hindistannan Kushqa shekem sozılg'an bir ju'z jigirma jeti wa'layattın' u'stinen patshalıq etetug'ın edi.
2 Sol waqıtta patsha Axashwerosh Suza qorg'an qalasındag'ı taxtına otırıp el basqardı.
3 Ol patshalıg'ının' u'shinshi jılında o'zinin' barlıq bekleri ha'm xızmetshileri ushın zıyapat berdi. Persiya ha'm Midiya a'skerbasıları, aqsu'yekler ha'm bir ju'z jigirma jeti wa'layattın' basshıları onın' aldına keldi.
4 Ko'p ku'nler, yag'nıy bir ju'z seksen ku'n dawamında Axashwerosh o'z patshalıg'ının' sheksiz baylıg'ın, ullılıg'ının' sulıwlıg'ın ha'm saltanatın ko'rsetti.
5 Sol ku'nler tamam bolg'annan keyin, patsha Suza qalasındag'ı xalıqtın' u'lken-kishisine arnap, o'z sarayının' bag' ha'wlisinde jeti ku'n zıyapat berdi.
6 Ha'wlinin' ma'rmer bag'analarına ornatılg'an gu'mis xalqalarg'a shım qızıl ha'm hasıl zıg'ır arqanlar menen baylang'an aq ha'm qızg'ısh ko'k ren'li gezlemeler ildirilgen edi. Ma'rmer ha'm ha'r tu'rli ren'degi taslar to'selgen ha'wlide altın ha'm gu'mis orınlıqlar ornatılg'an edi.
7 Sharaplar bir-birinen ayrıqsha bolg'an ha'r tu'rli altın ıdıslarda berildi. Patshanın' baylıg'ına jarasa, onın' sharabı da mol boldı.
8 Patshanın' buyrıg'ı boyınsha, hesh kim qonaqlardı sharap ishiwge ma'jbu'rlemedi. Sebebi patsha saray xızmetshilerine ha'r bir qonaqtın' tilegin orınlawdı buyırg'an edi.
9 Sol waqıtta xanbiyke Washtiy de patsha Axashweroshtın' sarayında hayallar ushın zıyapat berip atırg'an edi.
10 Jetinshi ku'ni sharap iship kewli ko'terilgen patsha o'zinin' Mehuman, Bizta, Xarbona, Bigta, Abagta, Zetar ha'm Karkas atlı jeti aqtasına
11 xanbiyke Washtiyge taj kiydirip, aldına alıp keliwdi buyırdı. Patsha xalıqqa ha'm beklerge onın' qanshelli go'zzal ekenin ko'rsetpekshi boldı. Sebebi xanbiyke Washtiy ju'da' sulıw edi.
12 Biraq xanbiyke Washtiy aqtalardın' patshadan a'kelgen buyrıg'ın orınlawdan bas tartıp, keliwdi qa'lemedi. Patshanın' bug'an qattı ashıwı kelip, g'a'zebi qaynap ketti.
13 Patsha zamannın' bag'ıtın biletug'ın danıshpan adamlar menen so'ylesti. O'ytkeni ol o'z islerin nızam ha'm qag'ıydalardı biletug'ınlardın' ha'mmesi menen ken'esip isleytug'ın edi.
14 Sol waqıtta patshanın' jaqınları bolg'an Karshena, Shetar, Admata, Tarshish, Meres, Marsena ha'm Memuxan atlı Persiya ha'm Midiyanın' jeti wa'ziri bar edi. Patshalıqta joqarı ma'rtebege iye bolg'an usı adamlar patsha menen ju'zbe-ju'z ko'rise alatug'ın edi.
15 Patsha olardan: – Menin' aqtalarım arqalı aytqan buyrıg'ımdı orınlamag'anı ushın, nızam boyınsha xanbiyke Washtiyge ne islew kerek? – dep soradı.
16 Sonda patsha ha'm wa'zirlerdin' aldında Memuxan bılay dep juwap berdi: – Xanbiyke Washtiy tek patshag'a qarsı emes, al barlıq beklerge ha'm patshanın' qolı astındag'ı pu'tkil wa'layatlardag'ı xalıqlardın' ha'mmesine qarsı ayıp isledi.
17 Sebebi xanbiykenin' islegen isi tuwralı ha'mme hayallar esitkende: «Patsha Axashwerosh xanbiyke Washtiydi aldına alıp keliwdi buyırg'anda, xanbiyke barmaptı», – dep aytıp ju'redi ha'm ku'yewlerin mensinbey qoyadı.
18 Bu'gin xanbiykenin' usı isi tuwralı esitken Persiya ha'm Midiya aqsu'yeklerinin' hayalları da o'z ku'yewlerine sonday qatnasta boladı ha'm ortadag'ı mensinbewshilikler menen kewil qalıspaqlardın' shegi bolmaydı.
19 Eger patshamız maqul ko'rse: «Washtiy endi patsha Axashweroshtın' aldına kelmesin, ha'm onın' xanbiyke degen abırayı onnan go're jaqsırag'ına berilsin», – degen pa'rman shıg'arsın. Bul pa'rman Persiya ha'm Midiyanın' hesh qashan o'zgertilmeytug'ın nızamlarına qosımsha etip jazıp qoyılsın.
20 Patshalıqtın' u'lken bolıwına qaramastan, patshanın' bul pa'rmanı pu'tkil patshalıqtın' ha'mme jerine jetip barg'anda, bay ha'm ka'mbag'al hayallardın' ha'mmesi o'z ku'yewlerin hu'rmet etetug'ın boladı.
21 Bul ga'p patshag'a da, wa'zirlerge de maqul tu'sti. Patsha Memuxannın' aytqanınday isledi.
22 Ol o'z qolı astındag'ı barlıq wa'layatlarg'a xat jiberdi. Xat ha'r bir wa'layatqa o'z jazıwında ha'm ha'r bir xalıqqa o'z tilinde jazılg'an bolıp, onda: «Ha'r bir erkek o'z u'yinin' xojayını bolsın ha'm o'z ana tilinde so'ylesin», – dep jazılg'an edi.
