Nexemiya 6 bob
1 Diywallardı qurıp, buzılg'an jerlerinin' birde birewin qaldırmay, tolıq on'lap bolg'anım Sanballat, Tobiya, arab xalqınan bolg'an Geshem ha'm basqa dushpanlarımnın' qulag'ına jetip bardı. Biraq ol waqıtta, men ele da'rwazalardın' qapıların ornatıp bolmag'an edim.
2 Sonda Sanballat penen Geshem mag'an adam jiberip: «Ono tegisligindegi awıllardın' birinde ushırasayıq», – dedi. Olar mag'an zıyan keltiriw niyetinde edi.
3 Sonlıqtan men de olarg'a xabarshılar jiberip: «Men u'lken bir is penen ba'ntpen. Sonlıqtan bara almayman. Ne ushın men isti taslap, sizlerge barıwım ha'm jumıstı toqtatıwım kerek?» – dedim.
4 Olar to'rt ma'rte sol xabardı jiberdi, men de to'rt ma'rte solay juwap qaytardım.
5 Sonda besinshi ret Sanballat mag'an o'z xızmetshisin jiberdi. Onın' qolında mo'rlenbegen ashıq xat bar edi.
6 Xatta bılay dep jazılg'an edi: «Basqa xalıqlar arasında xabarlar tarag'an, Geshem de bunı tastıyıqlaydı. Sen ha'm yahudiyler qozg'alan' ko'teriwdi oylap atırsızlar. Sol sebepten sizler diywallardı qayta tiklep atırg'an ekensiz. Usı xabarlarg'a qarag'anda, sen olarg'a patsha bolmaqshı ekensen'.
7 Ja'ne de, o'zin' haqqında: „Yahudanın' o'z patshası bar!“ dep ja'riyalawı ushın, sen payg'ambarlardı da tayınlapsan'. Bul so'zler, a'lbette, patshanın' qulag'ına jetip baradı. Sonlıqtan kel, birge ken'esip alayıq».
8 Men og'an adam jiberip: «Aytqanların'nın' ha'mmesi jalg'an, bulardı sen o'zin' oylap shıg'arg'ansan'», – dep juwap berdim.
9 Olardın' ha'mmesi bizlerdi qorqıtpaqshı bolıp: «Qolların isten suwıtsaq, is toqtaydı», – dep oylag'an edi. Bug'an qarsı, men Qudaydan qollarıma ku'sh beriwin soradım.
10 Bir ku'ni men Mehetabeldin' aqlıg'ı Delaya ulı Shemayanın' u'yine bardım. Ol u'yine tıg'ılıp alg'an edi. Ol mag'an: – Kel, Qudaydın' U'yinde, İbadatxananın' ishinde ushırasıp, esiklerin tas qılıp, ildirip alayıq. Sebebi olar seni o'ltiriw ushın kelejaq, tu'nde seni o'ltiriwge keledi, – dedi.
11 Biraq men og'an: – Men qashıp ketetug'ın adamg'a uqsayman ba? Yaki tiri qalıw ushın, İbadatxanag'a jasırınatug'ın adamg'a uqsayman ba? Barmayman, – dedim.
12 Men onı Qudaydın' jibermegenin, biraq onı Tobiya menen Sanballat parag'a satıp alg'anlıqtan, ol mag'an qarsı usınday jalg'an payg'ambarshılıq so'zlerin aytqanın tu'sinip jettim.
13 Olar meni qorqıtıw ushın ha'm qorqqanımnan onın' aytqanın qılıp, gu'na islewim ushın, Shemayanı jallag'an edi. Sonda meni jamanlap, abırayımdı to'giw ushın sebep tabılar edi.
14 Men bılay dep duwa ettim: «Qudayım, Tobiya menen Sanballattın' islegen islerin umıta go'rme! Sonday-aq meni qorqıtpaqshı bolg'an payg'ambar hayal Noadiyanı ha'm basqa payg'ambarlardı da esin'de saqlay go'r!»
15 Diywal Elul ayının' jigirma besinshi sa'nesinde*, eliw eki ku'nde pitkerildi.
16 Barlıq dushpanlarımız bul haqqında esitkende, a'tirapımızdag'ı xalıqlardın' ha'mmesi qorqıp ketti ha'm olardın' qattı en'sesi tu'sti. Sebebi olar bul istin' Qudayımızdın' ja'rdeminde islengenin tu'sindi.
17 Bunnan tısqarı, sol ku'nleri Yahuda aqsu'yekleri Tobiyag'a ko'p xatlar jazg'an bolıp, Tobiyadan da olarg'a xatlar kelip turdı.
18 Tobiya Arax ulı Shekaniyanın' ku'yew balası bolg'anlıqtan ha'm Tobiyanın' ulı Ehoxanan Berexiya ulı Meshullamnın' qızına u'ylengenlikten, Yahudadag'ı ko'p adamlar onın' menen nan sındırısıp, ant ishisken edi.
19 Ha'tte, olar Tobiyanın' jaqsı isleri haqqında mag'an aytatug'ın, menin' aytqanlarımdı da og'an jetkerip turatug'ın edi. Tobiya da meni qorqıtıw ushın xatlar jiberip turatug'ın edi.
