Nexemiya 1 bob
1 Xaxaliya ulı Nexemiyanın' so'zleri: Persiya patshası Artakserkstin' hu'kimdarlıg'ının' jigirmalanshı jılının' Kislew ayında men Suza qorg'an qalasında edim.
2 Sonda tuwısqanlarımnan biri Xananiy ayırım adamlar menen birge Yahudadan keldi. Men olardan su'rginnen qutılıp qalıp, tiri qalg'an yahudiyler ha'm Erusalim qalası tuwralı soradım.
3 Olar mag'an su'rginnen qutılıp qalıp, Yahuda wa'layatında tiri qalg'anlardın' qattı qıyınshılıq ha'm shermendelik awhalda qalg'anı, Erusalim diywallarının' wayran etilip, da'rwazalarının' o'rtep jiberilgeni tuwralı aytıp berdi.
4 Bul so'zlerdi esitkenimde, otırıp jıladım. Bir neshe ku'n qayg'ıg'a batıp ju'rdim, oraza tutıp, aspannın' Qudayına bılay dep duwa ettim:
5 5«O, aspannın' Qudayı Jaratqan İye! Sen ullı ha'm aybatlı Qudaysan'! Sen O'zin'di su'ygenler ha'm buyrıqların'dı orınlag'anlar menen du'zgen kelisimin'e sadıq qalasan'.
6 Qulın'nın' duwasın esitiw ushın qulaqların' tu'riwli, ko'zlerin' ashıq bolg'ay. Endi Senin' aldın'da qulların' bolg'an İzrail xalqı ushın ku'ni-tu'ni duwa etip, olardın' gu'naları ushın ta'wbe qılaman. Awa, bizler Senin' aldın'da gu'na isledik, men de, menin' a'kemnin' u'y-ishi de gu'na isledi.
7 Bizler Senin' aldın'da qattı jerkenishli islerdi isledik. Senin' qulın' Muwsag'a bergen buyrıqların'a, qag'ıydalar ha'm nızamların'a boysınbadıq.
8 Endi qulın' Muwsag'a bergen mına so'zlerin'di esin'e ala go'r: „Eger sizler Mag'an opasızlıq etsen'iz, Men sizlerdi xalıqlar arasına shashıp jiberemen.
9 Biraq Mag'an qaytıp kelsen'iz ha'm buyrıqlarıma boysınıp, olardı orınlasan'ız, jerdin' en' shetine quwg'ın qılıng'an bolsan'ız da, sizlerdi ol jerden jıynap alaman. Atımdı ullılaw ushın, tan'lap alg'an jerge sizlerdi alıp kelemen“.
10 İzrail xalqı – Senin' qulların' ha'm O'z xalqın'. Ullı qu'diretin' ha'm ku'shli qolın' menen olardı azat etkensen'.
11 O, İyem! Qulın' bolg'an menin' duwama ha'm Senin' atın'dı hu'rmet qılıwdan zawıqlanatug'ın qulların'nın' duwasına qulaq tu're go'r. Bu'gin mag'an a'wmet berip, patshada mag'an degen rehim oyata go'r». Sol waqıtları men patshanın' sharap quyıwshısı edim.
