Ezra 1 bob
1 Persiya patshası Kirdin' patshalıg'ının' birinshi jılında* Jaratqan İye O'zinin' Eremiya payg'ambar arqalı aytqan so'zin a'melge asırıw ushın, Persiya patshası Kirdin' ju'regine tu'rtki saldı. Sonda patsha Kir mınaday pa'rman shıg'arıp, onı pu'tkil patshalıg'ı boylap ja'riyalawdı ha'm jazba tu'rde taratıwdı buyırdı:
2 «Persiya patshası Kir bılay deydi: „Aspannın' Qudayı Jaratqan İye jer ju'zindegi barlıq patshalıqlardı mag'an berdi ha'm Yahudanın' Erusalim qalasına O'zi ushın bir İbadatxana qurıwdı mag'an tapsırdı.
3 Aran'ızdag'ı Onın' xalqınan bolg'an ha'r bir adamg'a Qudayı yar bolsın! Endi olar Yahudanın' Erusalim qalasına barıp, Erusalimdegi Qudaydın', yag'nıy İzraildın' Qudayı Jaratqan İyenin' İbadatxanasın qayta qursın.
4 Ha'zir tiri qalg'an yahudiyler jasap atırg'an jerlerdin' turg'ınları olardı gu'mis, altın, buyım ha'm mallar menen ta'miyinlew menen birge, Erusalimdegi Qudaydın' İbadatxanası ushın ıqtıyarlı sadaqalar bersin“».
5 Solay etip, Yahuda ha'm Benyamin urıwlarının' urıwbasıları, ruwxaniyler, lebiyliler ha'm Quday ta'repinen ruwxlandırılg'an ha'r bir adam Jaratqan İyenin' Erusalimdegi İbadatxanasın qayta qurıw ushın ketiwge tayarlandı.
6 Ha'mme qon'sıları ıqtıyarlı sadaqalarg'a qosa, olarg'a gu'mis buyımlar, altın, mal-mu'likler ha'm qımbatbaha na'rseler berip, ja'rdem qolların sozdı.
7 Patsha Kirdin' o'zi Jaratqan İyenin' İbadatxanasına tiyisli bolg'an zatlardı, yag'nıy Nabuxodonosordın' Erusalimnen alıp kelip, o'z qudayının' u'yine qoyg'an zatların ol jerden shıg'arttı.
8 Persiya patshası Kir olardı qaznashı Mitredatqa a'keldirip, Yahuda ha'kimi Sheshbassarg'a sanap tapsırttı.
9 Olardın' esabı mınaday edi: Altın ıdıs – 30 dana, Gu'mis ıdıs – 1000 dana, Pıshaq – 29 dana,
10 Altın tostag'an – 30 dana, Jup gu'mis tostag'an – 410 dana, Basqa buyımlar – 1000 dana.
11 Altın ha'm gu'mis buyımlardın' barlıg'ı 5400 dana edi. Su'rgin etilgenler Babilonnan Erusalimge qaytarılg'anda, Sheshbassar bul ıdıslardı o'zi menen birge alıp qayttı.
