2 Jılnama 19 bob
1 Yahuda patshası Ehoshafat Erusalimdegi sarayına aman-esen qaytıp kiyatırg'anda,
2 Xananiy ulı wa'liy Ehu Ehoshafattın' aldınan shıg'ıp, og'an bılay dedi: «Zalımlarg'a ja'rdem berip, Jaratqan İyeni jek ko'rgenlerdi su'yiwin' kerek pe edi? Bul isin' ushın sag'an Jaratqan İyenin' g'a'zebi to'gildi.
3 Degen menen, senin' jaqsı islerin' de bar. Sen eldi kiyeli ag'ashlarınan tazaladın' ha'm shın ju'rekten Qudaydı izledin'».
4 Ehoshafat Erusalimde jasadı. Biraq ol tez-tez Beer-Shebadan Efrayımnın' tawlı u'lkelerine deyin jasaytug'ın xalıqtı aralap, olardı atababalarının' Qudayı Jaratqan İyege ju'z burıwg'a shaqırar edi.
5 Ol Yahuda elindegi barlıq bekinisli qalalarg'a biyler qoydı.
6 Ol biylerge: «İslegen isin'izge dıqqatlı bolın'lar. Sebebi sizler adamlar atınan emes, al Jaratqan İyenin' atınan hu'kim shıg'arasızlar. Jaratqan İye hu'kim isinde sizler menen birge boladı.
7 Jaratqan İyeden qorqın', itibarlı tu'rde hu'kim shıg'arın'. O'ytkeni Qudayımız Jaratqan İye nahaqlıqqa, jalpıldaqlıqqa ha'm parag'a ko'z jumıp qaramaydı», – deytug'ın edi.
8 Ehoshafat Erusalimde de ayırım lebiylilerdi, ruwxaniylerdi ha'm İzraildın' a'wlad basshıların Jaratqan İyenin' Nızamına baylanıslı sheshimlerdi qabıllaw ha'm dawalardı sheshiw ushın tayınladı. Olar Erusalimde jasadı
9 Patsha olarg'a mınaday buyrıq berdi: «Sizler o'z wazıypaların'ızdı Jaratqan İyeden qorqqan halda, sadıqlıq penen shın ju'rekten orınlan'lar.
10 O'z qalalarında jasap atırg'an tuwısqanların'ız: to'gilgen qan tuwralı bolsın, Jaratqan İyenin' Nızamına, buyrıqlarına, qag'ıydalarına yamasa qararlarına baylanıslı bolsın, qanday da bir dawa menen kelse, olarg'a Jaratqan İyege qarsı gu'na islemewdi qatan' eskertin'. Sonda gu'nadan qalıs bolasız. Bolmasa, sizge de, tuwısqanın'ızg'a da Jaratqan İyenin' g'a'zebi to'giledi.
11 Jaratqan İyenin' Nızamına baylanıslı islerde bas ruwxaniy Amariya, patshag'a baylanıslı islerde Yahudanın' urıwbasısı İsmayıl ulı Zebadiya basshılıq etedi. Al lebiyliler bolsa, bul islerdi qadag'alawda sizlerge ja'rdem beredi. Ma'rt bolıp iske kirisin', Jaratqan İye jaqsılıq islewshilerge yar bolsın!»
