2 Jılnama 16 bob
1 Yahuda patshası Asanın' hu'kimdarlıg'ının' otız altınshı jılında İzrail patshası Baasha Yahudag'a qarsı shıqtı ha'm Asanın' jerlerine hesh kimnin' kirip-shıqpawı ushın, Rama qalasının' bekinisin ku'sheytti.
2 Sonda Asa Jaratqan İyenin' İbadatxanasındag'ı ha'm saray qaznasındag'ı gu'mis penen altındı aldı da, olardı xızmetshileri arqalı Damaskte jasaytug'ın Aram patshası Ben-Hadadqa jiberip, og'an bılay dedi:
3 «A'kelerimiz arasında bolg'anı sıyaqlı, bizlerdin' aramızda da kelisim bolsın. Sizge gu'mis ha'm altın jiberip atırman. İzrail patshası Baasha menin' jerimnen ketiwi ushın, siz onın' menen du'zgen kelisimin'izdi buzsan'ız».
4 Ben-Hadad patsha Asanın' usınısın qabıl etip, İzrail qalalarına qarsı a'skerbasıların jiberdi. Olar İyyon, Dan, Abel-Mayım qalaların, pu'tkil Naftaliy jerindegi barlıq telekleri bar qalalardı basıp aldı.
5 Baasha bunı esitkende, Ramanın' qurılısın toqtatıp, isti taslap ketti.
6 Patsha Asa pu'tkil yahudalılardı shaqırttı. Olar Rama qalasın qurg'anda, Baasha qollang'an tas ha'm ag'ashlardı Ramadan tasıp alıp ketti ha'm patsha Asa olardan Geba ha'm Mispa qalalarının' bekinisin ku'sheytti.
7 Sol waqıtları ko'zi ashıq Xananiy Yahuda patshası Asag'a kelip, bılay dedi: «Siz Qudayın'ız Jaratqan İyege su'yenbey, Aram patshasına su'yendin'iz. Sol sebepli Aram patshasının' a'skerlerin qoldan shıg'ardın'ız.
8 Esin'izge tu'sirin', kushlılar menen liviyalılar ko'p sanlı sawash arbaları ha'm atlıları menen u'lken bir orda bolıp kelmep pe edi? Sonda siz Jaratqan İyege su'yengenin'iz ushın, Ol olardı sizge ta'slim etken edi.
9 Jaratqan İye O'zine shın ju'rekten sadıq bolg'anlarg'a ku'sh-quwat berip turıw ushın, pu'tkil jer ju'zine na'zer salıp turadı. Siz aqılsızlarsha is tuttın'ız, sol sebepli bunnan bılay sizin' basın'ız urıstan shıqpaydı».
10 Asa ko'zi ashıqtın' bul so'zlerine g'a'zeplendi. Onın' g'a'zeplengeni sonshelli, ko'zi ashıqtı zindang'a taslattı. Sol waqıtları Asa xalqının' ayırımlarına qısım ko'rsetip, ezdi.
11 Asanın' barlıq isleri basınan ayag'ına shekem, Yahuda ha'm İzrail patshalarının' jılnama kitabında jazılg'an.
12 Hu'kimdarlıg'ının' otız tog'ızınshı jılında, Asa ayaq awırıwına shalındı. Awırıwı asqınlap atırg'an bolsa da, ol Jaratqan İyege ju'z burmay, ta'wiplerden u'mit etti.
13 Asa o'z hu'kimdarlıg'ının' qırıq birinshi jılı o'lip, ata-babalarına qosıldı.
14 Onı ha'r tu'rli xosh iyisli zatlarg'a toltırılg'an tabıtqa jatqarıp, Dawıttın' qalasında o'zi ushın oydırg'an qa'birge qoydı. Onın' hu'rmetine u'lken ot jaqtı.
