2 Jılnama 1 bob
1 Dawıt ulı Sulayman o'z patshalıg'ın bekkemlep aldı. Qudayı Jaratqan İye onın' menen birge bolıp, ma'rtebesin ju'da' joqarılattı.
2 Bir ku'ni Sulayman pu'tkil İzrail xalqın – mın'basılardı, ju'zbasılardı, biylerdi, İzraildın' barlıq ko'semlerin ha'm a'wlad basshıların shaqırttı.
3 Sulayman jıynalg'anlardı ertip, Gibon qalasındag'ı sıyınıw ornına jol aldı. Qudaydın' Ushırasıw shatırı sol jerde bolıp, onı Jaratqan İyenin' qulı Muwsa sho'lde tikken edi.
4 Dawıt Qudaydın' Kelisim sandıg'ın qoyıw ushın Erusalimde bir shatır tigip, sandıqtı Kiryat-Yarimnen sol shatırg'a alıp barg'an edi.
5 5Biraq Xurdın' aqlıg'ı Uriydin' ulı Besalel qurg'an qoladan islengen qurbanlıq orın ele Gibondag'ı Jaratqan İyenin' Muxaddes shatırının' aldında turg'an edi. Sulayman ha'm jıynalg'an xalıq Qudaydın' erkin biliw ushın sol jerge bardı.
6 Sulayman Jaratqan İyenin' aldında Ushırasıw shatırının' aldındag'ı qoladan islengen qurbanlıq orıng'a ko'terilip, onda mın' bas maldı jandırıp qurbanlıqqa berdi.
7 Sol tu'ni Quday Sulaymang'a ko'rinip, og'an: – Tile tilegin'di, sorag'anın'dı beremen! – dedi.
8 Sulayman Qudayg'a bılay dedi: – A'kem Dawıtqa u'lken jaqsılıq islep, meni onın' ornına patsha etip qoydın'.
9 Endi Qudayım, Jaratqan İye, a'kem Dawıtqa bergen wa'den'di orınla! Aqırı, Sen meni jerdin' shan'ınday ko'p bolg'an xalıq u'stinen patsha etip qoydın'.
10 Bul xalıqtı basqara alıwım ushın, mag'an danalıq ha'm bilim ber. Bolmasa, bul ullı xalqın'a kim hu'kimdarlıq qıla aladı?
11 Quday Sulaymang'a bılay dedi: – Demek ju'regin'nin' qa'lewi usı. Sen baylıq, mal-mu'lik, dan'q-ataq yaki dushpanların'a o'lim tilemedin', ha'tte, o'zin' ushın uzaq o'mir de soramadın'. Qaytama, seni patsha etip qoyg'an xalqımdı basqarıw ushın danalıq ha'm bilim soradın'.
12 Sonlıqtan sag'an danalıq ha'm bilim beriledi. Bug'an qosa, sag'an deyingi hesh bir patsha ko'rmegen ha'm sennen keyin de hesh bir patsha ko'rmeytug'ın baylıq, mal-mu'lik ha'm dan'q-ataq beremen.
13 Sulayman Gibondag'ı Ushırasıw shatırı ornalasqan sıyınıw ornınan Erusalimge keldi ha'm İzrail u'stinen hu'kimdarlıq qıla basladı.
14 Sulayman sawash arbaları menen atlardı ko'beytti. Onın' bir mın' to'rt ju'z sawash arbası ha'm on eki mın' atı bar edi. Olardın' bir bo'legin sawash arbaları saqlanatug'ın qalalarg'a, bir bo'legin o'zinin' janına, Erusalimge jaylastırdı.
15 Patsha Erusalimde gu'mis penen altındı a'piwayı taslarg'a ten' qılıp qoydı, al kedr ag'ashın batıstag'ı taw eteklerinde o'setug'ın jabayı a'njir ag'ashı sıyaqlı mol etti.
16 Sulaymannın' atları Mısır menen Quweden alıp kelindi. Patshanın' sawdagerleri atlardı Quweden satıp alatug'ın edi.
17 Mısırdan ha'r bir sawash arbası altı ju'z shekel gu'miske, ha'r bir at bir ju'z eliw shekel gu'miske satıp a'kelinip, olar patsha sawdagerleri arqalı pu'tkil xettler menen aramlardın' patshalarına satılatug'ın edi.
